Qlobal Bakı Forumunda dünya gündəmində duran mühüm məsələlər müzakirə edilir. Müzakirələrdə səhiyyə, maliyyə və iqlim dəyişikliyi məsələlərinə toxunulur. Biz burada COVID-19 pandemiyasına və digər xəstəliklərə, eləcə də iqlim dəyişikliklərinə necə qalib gəlməyin yollarını müzakirə etdik.

Bu sözlərimüsahibəsində Beynəlxalq Atom Enerjisi Agentliyinin baş direktorunun müavini, XI Qlobal Bakı Forumunun iştirakçısı Najat Moxtar deyib.

N.Moxtar Qlobal Bakı Forumunun mühüm platformaya çevrildiyini və bir sıra yüksəkvəzifəli şəxsləri bir araya gətirərək fikir mübadiləsi aparmalarına imkan yaratdığını vurğulayıb.

“Azərbaycan COP29-a ev sahibliyi edəcək və konfransda iqlim dəyişiklikləri ilə bağlı mühüm məsələlər müzakirə olunacaq. Zənnimcə, iqlim dəyişikliyi hələ uzun müddət bizim gündəmimizdə qalacaq. Bu dəyişikliklərə uyğunlaşmaq üçün yüksək texnologiyalardan istifadə olunmalıdır. Yüksək texnologiyalar bizə su ehtiyatlarımızdan səmərəli istifadə etməkdə, eləcə də quraqlığa qarşı mübarizə aparmaqda kömək olacaq”, - deyə qonaq diqqətə çatdırıb.