İyirmi ildən çox davam edən bərpa işlərindən sonra Qədim Misirin 18-ci Amun sülaləsinin (e.ə. 1550-1292) böyük katibi Neferhotepin sərdabəsinin rəsmi açılışı olub.

AZƏRTAC “Əl Əhram” nəşrinə istinadla xəbər verir ki, Luksor şəhərinin İordan çayının qərb sahilindəki Əl-Xoxa bölgəsində yerləşən sərdabənin açılış mərasimində Misirin Antik Əsərlər Ali Şurasının baş katibi Mustafa Vəziri və Argentinanın Qahirədəki səfiri Qonzalo Urriolabeitia iştirak ediblər.

M.Vəziri jurnalistlərə müsahibəsində bildirib ki, xüsusilə qış mövsümündə ölkəyə gələn turistlərin çoxalması fonunda sərdabənin açılışı Luksorun İordan çayının qərb sahilindəki tarixi məkanların cazibədarlığına yeni bir çalar əlavə edir. O qeyd edib ki, sərdabədə gözəl rənglənmiş səhnələr və yazılar var.

Sərdabənin bərpasına 2000-ci ildə başlanılıb. Argentinanın Buenos-Ayres Universitetinin missiyası onun epiqrafik və arxeoloji aspektlərinin qeydə alınması və öyrənilməsinə cavabdeh idi, Almaniya arxeoloji qrupu isə divar rəsmlərinin konservasiyası və təmizlənməsi ilə məşğul olub.

Argentina missiyasının rəhbəri Violeta Pereyra deyib: “Layihə Gerda Henkel Fondunun ayırdığı qrant sayəsində həyata keçirilib və Misirin Turizm və Qədim Əsərlər Nazirliyinin nəzarəti altında olub”.

Sərdabədəki divar rəsmləri bir vaxtlar rəngarəng və yüksək bədii keyfiyyətə malik olsalar da, XIX əsrin əvvəllərində onların bir hissəsi pozulub. Geniş və diqqətli araşdırmadan sonra alman komandası lazerlərdən istifadə edərək, kövrək divar rəsmlərini və heroqlifləri üzə çıxarmaq üçün yeni üsul hazırlayıb. Bundan əlavə, divar rəsmlərini, relyef və heykəllər üzərində boş daş parçalarını, çatları, ayrılmış suvaq və boya qatlarını sabitləşdirmək üçün daha geniş konservasiya tədbirləri həyata keçirilib.