"Qəbələ" klubu baş menecer Nail Kərimovla yollarını ayırıb.

Premyer Liqa təmsilçisindən AZƏRTAC-a verilən məlumata görə, 2021-ci ilin dekabrından bu vəzifəni tutan funksioner öz istəyi ilə “qırmızı-qaralar”dan ayrılıb.

2006-cı ildən klubda işləyən N.Kərimov mətbuat xidmətinin rəhbəri, akademiyanın direktor müavini və rəhbəri, həmçinin baş menecer kimi fəaliyyət göstərib.

Onun akademiyada çalışdığı dövrdə aşağı yaş qrupu üzrə komandalar dəfələrlə ölkə çempionatının qalibi və mükafatçısı olub, beynəlxalq yarışlarda uğurlar qazanıb, U-19 avrokuboklarda mübarizə aparıb.

Kərimov baş menecer kimi əsas komanda ilə ötən mövsüm Azərbaycan kubokunun qalibi adını qazanıb.