2020-ci il noyabrın 9-u Azərbaycan tarixinin ən möhtəşəm, ən qürurlu və ən unudulmaz səhifələrindən biri kimi yaddaşlara əbədi həkk olundu. Bu gün Vətən müharibəsinin 44-cü, sonuncu döyüş günü olmaqla yanaşı, Azərbaycan xalqının milli qürurunun, dövlətçilik iradəsinin və tarixi ədalət uğrunda mübarizəsinin təntənəsinə çevrildi. Təqvimin bu günü xalqımız üçün ikiqat əlamətdar idi: noyabrın 9-u həm də Dövlət Bayrağı Günü idi. Məhz həmin gün üçrəngli bayrağımızın mənəvi ucalığı ilə Qarabağ səmasında dalğalanan azadlıq rəmzləri bir-birini tamamlayır, xalqımızın illərlə ürəyində yaşatdığı müqəddəs arzu gerçəkliyə çevrilirdi.

Göy, qırmızı və yaşıl rəngləri ilə milli kimliyimizi, müasirlik amalımızı və mənəvi dəyərlərimizi təcəssüm etdirən Azərbaycan bayrağı sadəcə dövlət rəmzi deyil, xalqımızın azadlıq iradəsinin, müstəqillik əzminin və milli birliyinin ifadəsidir. Azərbaycan Xalq Cümhuriyyəti hökuməti tərəfindən 1918-ci il noyabrın 9-da qəbul edilən üçrəngli bayrağımız sonralar Ümummilli Lider Heydər Əliyevin təşəbbüsü ilə Naxçıvanda yenidən dövlət bayrağı kimi təsdiqləndi. Prezident İlham Əliyevin 2009-cu ildə imzaladığı Sərəncamla noyabrın 9-u Dövlət Bayrağı Günü elan edildi. İllər sonra həmin tarixdə bayrağımızın işğaldan azad edilmiş torpaqlarımızda dalğalanması isə bu günün tarixi və mənəvi mahiyyətini daha da ucaltdı.

Sentyabrın 27-də başlayan Vətən müharibəsi artıq həlledici mərhələsinə çatmışdı. Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 44 gün ərzində düşmənin illərlə yaratdığı istehkamları darmadağın etmiş, şəhər və kəndlərimizi bir-birinin ardınca işğaldan azad etmişdi. Noyabrın 8-də Şuşanın azad edilməsi isə bu mübarizənin ən parlaq hərbi və mənəvi qələbələrindən biri oldu. Qarabağın tacı sayılan Şuşanın azadlığı Azərbaycan xalqının Zəfər sevincini zirvəyə yüksəltdi. Lakin ordumuz son döyüş günündə də dayanmadı. Hər qarış torpağın azadlığı uğrunda mübarizə davam edir, düşmənin mövqeləri ardıcıl olaraq sıradan çıxarılırdı.

Noyabrın 9-da Azərbaycan Prezidenti, Müzəffər Ali Baş Komandan İlham Əliyev gün ərzində xalqımıza növbəti qələbə xəbərlərini çatdırdı. İlk açıqlamada Füzulinin Qobu Dilağarda, Yal Pirəhmədli, Yuxarı Yağlıvənd, Dilağarda, Seyid Mahmudlu və Ələsgərli, Xocalının Dəmirçilər, Çanaqçı, Mədətkənd və Sığnaq, Xocavəndin Susanlıq, Domi, Tuğ, Akaku və Azıx, Cəbrayılın Hüseynalılar, Söyüdlü və Aşağı Sirik, Qubadlının Yuxarı Mollu, Aşağı Mollu və Xocik, Zəngilanın isə Keçikli və Ördəkli kəndlərinin işğaldan azad edildiyi bildirildi. Bu, günün ilk qələbə müjdəsi idi.

Günün davamında Azərbaycan Ordusunun uğurlu əməliyyatları daha geniş miqyas aldı. Füzuli rayonunun Aşağı Güzdək, Qovşatlı, Mirzəcamallı, Şəkərcik, Mərdinli, Şıxlı, Qaraməmmədli, Dövlətyarlı, Hacılı, Hüseynbəyli və Saracıq kəndləri, Xocalı rayonunun Şuşakənd, Muxtar və Daşaltı kəndləri, Xocavənd rayonunun Mets Tağlar, Salakətin, Zoğalbulaq, Aragül, Tağavard, Böyük Tağavard, Zərdanaşen və Şəhər kəndləri azad edildi. Cəbrayıl rayonunun Qalacıq, Molla Həsənli, Əsgərxanlı, Yuxarı Nüsüs, Aşıq Məlikli, Niftalılar, Qərər və Çələbilər kəndləri, Qubadlı rayonunun Qaramanlı, Xəndək, Həmzəli, Mahrızlı, Hal, Ballıqaya, Ulaşlı, Tinli, Xocahan, Boyunəkər, Qaraqoyunlu və Çərəli kəndləri də düşmən işğalından qurtuldu.

Zəngilan rayonunda Sobu, Qaragöz və İsgəndərbəyli kəndləri, Bartaz qəsəbəsi və Bartaz, Sığırt, Şükürataz yüksəklikləri, eləcə də daha beş adsız strateji yüksəklik Azərbaycan Ordusunun nəzarətinə keçdi. Bununla da cəbhənin müxtəlif istiqamətlərində əldə edilən uğurlar düşmənin hərbi mövqelərini daha da zəiflətdi, Azərbaycanın strateji üstünlüyünü möhkəmləndirdi.

Beləliklə, noyabrın 9-da Azərbaycan Ordusu 71 kəndi, 1 qəsəbəni və 8 strateji yüksəkliyi işğaldan azad etdi. Bu rəqəmlərin hər birinin arxasında bir elin yurduna qayıdış ümidi, bir ailənin doğma ocağına qovuşmaq arzusu, bir xalqın illərlə davam edən həsrətinin sona çatması dayanırdı. Azad edilən hər kənddə, hər yüksəklikdə dalğalanan üçrəngli bayrağımız Azərbaycanın tarixi torpaqlarına qayıdışının, dövlət suverenliyinin və milli qürurunun rəmzinə çevrilirdi. Bayraq Günündə xalqımıza verilən bu möhtəşəm müjdələr Zəfərin necə böyük mənəvi dəyər daşıdığını bir daha göstərirdi.

Noyabrın 9-nun hərbi-siyasi mənzərəsi artıq Azərbaycanın qələbəsinin qarşısıalınmaz olduğunu göstərirdi. Şuşanın azad edilməsi, ardınca noyabrın 9-da 71 kəndin, bir qəsəbənin və səkkiz strateji yüksəkliyin düşmən işğalından qurtarılması Ermənistanın hərbi-siyasi rəhbərliyini ağır reallıqla üz-üzə qoymuşdu. Azərbaycan Ordusunun döyüş meydanında qazandığı üstünlük siyasi müstəvidə də öz nəticəsini diktə edirdi. Otuz ilə yaxın davam edən işğalın sona çatması, torpaqlarımızın azadlığı və bölgədə yeni reallıqların formalaşması artıq tarixi zərurətə çevrilmişdi.

Noyabrın 9-dan 10-na keçən gecə Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan üçtərəfli Bəyanatı imzaladılar. Sənədə əsasən, 10 noyabr 2020-ci il tarixindən etibarən Dağlıq Qarabağ münaqişəsi zonasında atəşin və bütün hərbi əməliyyatların tam dayandırılması elan olundu. Bəyanatın digər müddəalarına uyğun olaraq Ağdam, Kəlbəcər və Laçın rayonlarının Azərbaycana qaytarılması nəzərdə tutuldu. Bununla da 44 günlük Vətən müharibəsinin hərbi mərhələsi başa çatdı və Azərbaycanın döyüş meydanında qazandığı tarixi qələbə siyasi müstəvidə də rəsmiləşdi.

44 gün ərzində Azərbaycan xalqı misilsiz birlik və həmrəylik nümayiş etdirdi. Cəbhədə əsgər və zabitlərimiz torpaqlarımızın azadlığı uğrunda qəhrəmanlıq göstərdiyi halda, arxa cəbhədə hər bir vətəndaş eyni amal ətrafında birləşdi. Şəhidlərimizin qanı ilə suvarılan bu Zəfər yolu xalqımızın yaddaşına əbədi həkk olundu. Onların fədakarlığı, qazilərimizin döyüş şücaəti və ordumuzun peşəkarlığı Azərbaycan tarixinin ən şərəfli səhifələrini yaratdı.

Bu gün 9 noyabrın tarixi mənasına nəzər salarkən bir həqiqəti xüsusi qürurla vurğulayırıq: Dövlət Bayrağı Günündə üçrəngli bayrağımızın azad edilmiş torpaqlarımızda dalğalanması sadəcə hərbi qələbənin görüntüsü deyil, milli ruhumuzun, dövlətçilik iradəmizin və müstəqilliyimizin təntənəsi idi. O bayraq illərlə Vətən həsrəti ilə yaşayan insanların ümidini, şəhidlərimizin müqəddəs arzusunu, qazilərimizin qəhrəmanlığını və bütöv xalqın sarsılmaz əzmini özündə birləşdirirdi.

Noyabrın 9-u Vətən müharibəsinin sonuncu döyüş günü kimi tarixə düşdü. Lakin həmin günün mənəvi əzəməti heç vaxt sona çatmayacaq. Çünki bu tarix bir xalqın öz taleyinə sahib çıxmasının, bir dövlətin qüdrətini nümayiş etdirməsinin, milli bayrağının şərəfini qorumasının tarixidir. Şuşada ucalan Zəfər ruhu, Qarabağın hər guşəsində dalğalanan üçrəngli bayrağımız və xalqımızın yaddaşına yazılan qəhrəmanlıq salnaməsi bundan sonra da nəsillərə qürur mənbəyi olacaq.

Bu Zəfər bir günün, bir döyüşün, bir hərbi əməliyyatın nəticəsi deyildi. Bu, xalqın birliyi, dövlətin qətiyyəti, ordunun gücü və şəhidlərimizin müqəddəs qanı ilə qazanılmış tarixi Qələbə idi. Müzəffər Ali Baş Komandan İlham Əliyevin rəhbərliyi ilə Azərbaycan Ordusu xalqımızın 30 ilə yaxın davam edən torpaq həsrətinə son qoydu, milli qürurumuzu ucaltdı və tariximizin yeni səhifəsini yazdı.

Bir xalqın qüruru, bir dövlətin şərəfi, şəhidlərimizin qanı ilə ucalan müqəddəs əmanət – üçrəngli Azərbaycan bayrağı Qarabağ səmasında əbədi dalğalanacaq!

Qarabağ Azərbaycandır! Zəfər bizimdir!

Nurəngiz Adilqızı