Üzvlərimizə müraciət edərək bildirmək istəyirik ki, artıq yaz aylarına yaxınlaşırıq, hazırda erkən rezervasiyalar həyata keçirilir. Mütləq şəkildə turistlərlə turizm şirkətləri arasında əldə olunan bütün turpaketlərin müqavilələri imzalanmalıdır.

Bunu AZƏRTAC-a müsahibəsində Azərbaycan Turizm Agentlikləri Assosiasiyasının İdarə Heyətinin sədri Göydəniz Qəhrəmanov söyləyib.

O bildirib ki, həmin yazılı sənədin olmaması sonradan turistlərə bir çox çətinliklər yaşadır. “Tərəflər arasında yazılı öhdəlik olmayanda sonradan kimin haqlı, kimin haqsız olduğuna aydınlıq gətirmək çox çətin olur. Şirkətlər də bu məsələyə qeyri-ciddi yanaşır. Düzdür, həmin şirkətlər bizim üzvlərimiz deyildi. Buna baxmayaraq belə halların yaşanmaması üçün mütləq şəkildə bu müqavilələr imzalanmalıdır”, - deyə G.Qəhrəmanov diqqətə çatdırıb.