Arpaçay Karate Klubu və Azərbaycan Qan Donorluğunun İnkişafı Mərkəzinin birgə təşkilatçılığı, İnclusive Organization Team və Mərkəzi Qan Bankının tərəfdaşlığı, həmçinin Bakı İdman Sarayının dəstəyi ilə şəhidlərimizin əziz xatirəsinə həsr olunmuş “Sağlam olaq - donor olaq” şüarı altında qanvermə aksiyası həyata keçirilir. Aksiya "Hemofiliya və talassemiyadan əziyyət çəkən uşaqlara qayğı" Dövlət Proqramına uyğun, həmçinin Heydər Əliyev Fondunun "Talassemiyasız həyat naminə" proqramı çərçivəsində təşkil edilir.

Bu sözləri AZƏRTAC-a açıqlamasında Azərbaycan Qan Donorluğunun İnkişafı Mərkəzinin İdarə Heyətinin sədri Fuad Rəsulov söyləyib.

F.Rəsulov bildirib ki, biz zəfər çalmış, qəhrəman bir xalqın nümayəndələriyik: “Qanvermə aksiyasının məhz bu gün keçirilməsi çox qürurvericidir. Şəhidlərimizin adı ilə bağlı müxtəlif tədbirlər həyata keçirilir, bu gün keçirilən aksiya da məhz həmin tədbirlərdəndir. Şəhidlərimiz bizim qürur mənbəyimizdir. Buna görə də şüarımız “Sağlam olaq - donor olaq” adı altında şəhidlərimizin əziz xatirəsinə həsr olunub. Əgər bir insan sağlam deyilsə, o donor ola bilmir. Ona görə, xüsusən gənclərimizin asudə vaxtlarının səmərəli təşkili, onların pis vərdişlərdən uzaq olması məqsədilə mütəmadi olaraq idman cəmiyyətləri federasiyaları ilə əlaqələr saxlanılır. Onların belə aksiyalarda “sağlam bədəndə sağlam ruh olar” devizi altında iştirakı təmin edilir”.

İdarə Heyətinin sədri xüsusi vurğulayıb ki, məhz qan komponentlərini heç bir dərman preparatı əvəz etmir: “Ona görə də toplanan qan ehtiyatı yoxlanılaraq talassemiya, hemofiliya, eləcə də leykoz (qan xərçəngi) xəstəliyindən əziyyət çəkən şəxslər üçün istifadə olunacaq. Bizlər belə qanvermə aksiyalarını mütəmadi həyata keçirməliyik. Çünki toplanan qan ehtiyatları həmin xəstəliklərdən əziyyət çəkən insanların sağlamlığına böyük fayda vermiş olur”.