Bu gün Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın doğum günüdür

Görkəmli ictimai-siyasi xadim Mehriban xanım Əliyevanın humanizm və mərhəmət kimi ali mənəvi keyfiyyətlərindən irəli gələn çoxşaxəli fəaliyyətinin təməlində xalqa layiqli xidmət dayanır.

Xeyirxahlığı, insanlara qayğı və sevgisi, nəcib təşəbbüsləri və bənzərsiz ictimai fəaliyyəti ilə Mehriban xanım cəmiyyətin bütün təbəqələrinin dərin hörmət və rəğbətini qazanıb.

Ulu Öndərin adını şərəflə daşıyan Heydər Əliyev Fondu Mehriban xanımın rəhbərliyi ilə Ümummilli Liderimizin müdrikliyə əsaslanan həyat və fəaliyyətini, zəngin dövlətçilik irsini öyrənən ideoloji-humanitar mərkəz kimi üzərinə götürdüyü çətin vəzifənin öhdəsindən layiqincə gəlir, xalqımızın rifahına yönəlmiş irimiqyaslı layihələrin təşəbbüskarı və fəal icraçısıdır.

Birinci Vitse-Prezident kimi Mehriban Əliyeva Azərbaycan səhiyyə sisteminin inkişafına misilsiz töhfələr verib. Onun rəhbərliyi ilə Heydər Əliyev Fondu tərəfindən həyata keçirilən layihələr səhiyyə infrastrukturunun müasirləşdirilməsinə və əhalinin sağlamlıq xidmətlərinə əlçatanlığının artırılmasına xidmət edir.

Vətən Müharibəsindən dərhal sonra Birinci vitse-prezidentin təşəbbüsü ilə Səhiyyə Nazirliyinin Sanator-Kurort Reabilitasiya Mərkəzi müharibə veteranlarının xidmətinə verilib. Mehriban xanımın təşəbbüskarı olduğu “Diabetli uşaqlara ən yüksək qayğı”, “Talassemiyasız həyat naminə”, digər mərhəmət, həyat dolu layihələr, xeyriyyə aksiyaları böyük sevgi və rəğbətlə qarşılanır.

Hamıya örnək olan genişmiqyaslı fəaliyyətinin əsasını əməli işi ilə təsdiq edən Mehriban xanım Azərbaycan qadınlarının lideridir.

İxtisasca həkim olan Mehriban xanım Əliyeva səhiyyə sahəsində çalışanlara həmişə diqqət və qayğı göstərir, tibb işçilərinin əməyini və fədakarlığını daim yüksək qiymətləndirir.

Birinci vitse-prezident Mehriban Əliyevanın “həkimlərin hər an qəbul etdikləri qərarlar, peşəkar bilik və bacarıqları, fədakarlıq və şəfqəti bizim əsas silahımız və ümidimizdir” söylədiyi fikirlər bu sahənin nümayəndələrinə əlavə stimul verir.

Səhiyyə Nazirliyinin rəhbərliyi və kollektivi Azərbaycan Respublikasının Birinci vitse-prezidenti Mehriban xanım Əliyevanı doğum günü münasibətilə təbrik edir, möhkəm cansağlığı arzulayır, Azərbaycan Respublikasının Prezidenti ilə birgə Vətənimizin tərəqqisi naminə yorulmaz fəaliyyətlərində yeni-yeni uğurlar diləyir!