Azərbaycan Həmkarlar İttifaqları Konfederasiyasının (AHİK) və üzv təşkilatların ölkəmizin səfalı guşələrində istirahət mərkəzləri və sanatoriya-kurort müəssisələri var. Belə müəssisələrdən biri də “Duzdağ” istirahət kompleksidir. Bura ləziz və sağlam mətbəxi, bir-birindən maraqlı əyləncə növləri, geniş və işıqlı otaqları ilə 5 ulduzlu məkanın lüks və rahatlığını özündə birləşdirir. “Duzdağ” hoteldə 144 otaq və 7 villa var. İstirahət kompleksindəki aqua-park, sürüş zolağı, oyun zalı və kafedən ibarət “Duzdağ” kartinq mərkəzi, “Duzdağ” hotel spa mərkəzi, mini futbol meydançası buraya üz tutanların ixtiyarındadır.

Azərbaycan Həmkarlar İttifaqları Konfederasiyasının “Duzdağ” müalicə mərkəzi də fəaliyyət göstərir. Labirint şəkilində ümumi uzunluğu 42 kilometr olan Duzdağın yeraltı hissəsi girişdən 300 metr məsafədə, 110 metr dərinlikdədir. Burada ilin bütün fəsillərində havanın temperaturu 18-20 dərəcə, nisbi rütubət 24-50 faiz arasında dəyişir. Duzu bir çox xəstəliklərin, o cümlədən bronxial astma, bronxit, astma öncəsi vəziyyət, pollinoz, astmatik komponentli xroniki bronxit, allergik rinit və digər xəstəliklərin müalicə və profilaktikasında faydalıdır. Mərkəzdə xəstələr üçün 474 çarpayı mövcuddur.Qeyd edək ki, əlçatanlığın və şəffaflığın təmin olunması, növbəlik prinsipinin qorunması məqsədilə AHİK yollayışların verilməsini mərkəzləşdirilmiş qaydada həyata keçirir.Həmçinin ittifaq üzvlərinin qış aylarında dincəlməsi və müalicə almaları üçün endirimli yollayışlar təklif olunur. Belə ki, endirimli yollayışın dəyərinin cəmi 15 %-ni ödəməklə onu əldə etmək mümkündür.