Azərbaycan Həmkarlar İttifaqları Konfederasiyasının (AHİK) üzv təşkilatı Aqrar Sahə İşçilərinin Həmkarlar İttifaqı Birliyinin rəhbərliyi Azərbaycan Dövlət Aqrar Universitetinin (ADAU) professor-müəllim heyəti ilə görüşüb.
Görüşdə sahə həmkarlar ittifaqlarının 2024-cü ildə gördüyü işlər barədə məlumat verən Aqrar Sahə İşçilərinin Həmkarlar İttifaqı Birliyinin sədri Fuad Məmmədov qurumun fəaliyyət istiqamətləri üzrə əldə olunan nəticələri diqqətə çatdırıb. O, aqrar sektorda fəaliyyət göstərən müəssisə və təşkilatlarda əmək münasibətlərinin mövcud qanunvericiliyə uyğun qurulması, əmək hüquqlarının qorunmasında həmkarlar ittifaqlarının üzərinə düşən vəzifələri qeyd edib.
Sonra tədbirdə ADAU Həmkarlar ittifaqı komitəsinin təsis yığıncağı keçirilib, komitənin tərkibi formalaşıb, yeni sədr seçilib. ADAU Həmkarlar ittifaqı komitəsinin yekdil qərarı ilə qurumun Aqrar Sahə İşçilərinin Həmkarlar İttifaqı Birliyinin tərkibinə keçməsi barədə qərar qəbul olunub. Həmçinin ADAU Tələbə həmkarlar ittifaqının yenidən formalaşdırılması ilə bağlı müzakirələr aparılıb və müvafiq qərarlar qəbul olunub.