Sovet imperiyasının Azərbaycana qarşı ən böyük təxribatlarından biri də 20-ci əsrin sonlarında əzəli və əbədi torpağımız olan Qarabağı Ermənistana birləşdirmək cəhdi idi. Mətin oğul və qızlarımız bu çirkin plana qarşı birlik nümayiş etdirdi, müstəqillik tələbi ilə qətiyyətlə ayağa qalxdı, heç nədən çəkinməyərək haqq səsini ucaltdı. Totalitar rejim buna cavab olaraq 1990-cı il yanvarın 19-dan 20-nə keçən gecə dinc əhaliyə silah işlətdi. Nəticədə ümumilikdə Respublika üzrə 147 nəfər həlak edildi, 744 nəfər yaralandı, 841 nəfər qanunsuz həbs olundu, 200 ev və mənzil, 80 avtomaşın, o cümlədən təcili yardım maşınları, dövlət əmlakı və şəxsi əmlak məhv edildi. Dövlət, ictimai və şəxsi əmlaka həmin dövrün qiymətləri ilə 5.637.286 rubl miqdarında maddi ziyan vuruldu. Faciənin ertəsi günü - yanvarın 21-də Ulu Öndərimiz Heydər Əliyev Azərbaycanın Moskvadakı daimi nümayəndəliyinə gələrək xalqla birgə olduğunu bildirdi, 20 Yanvar faciəsinə siyasi qiymət verdi, onun hüquqa, demokratiyaya, humanizmə zidd olduğunu, mərkəzin və ozamankı respublika rəhbərlərinin xəyanəti üzündən baş vermiş siyasi səhv olduğunu bəyan etdi. O, faciə ilə əlaqədar xalqımıza başsağlığı verdi və mətbuat konfransı keçirib Bakıdakı terror aktına rəvac verən hakimiyyət nümayəndələrini və hərbçiləri cinayətkar, onların dinc əhaliyə tutduqları divanı isə bütöv bir xalqa qarşı edilən tarixi cinayət adlandırdı. Bu tarixi çıxışın mətni Kremlin kəskin informasiya blokadası siyasətinə baxmayaraq, bütün dünyada, o cümlədən Azərbaycanda yayıldı və geniş əks-səda doğurdu. 
20 Yanvar hadisəsində həyatlarını qurban verən Vətən övladları misilsiz fədakarlıqları ilə xalqımızın qəhrəmanlıq salnaməsinə yeni parlaq səhifə yazdılar. Xalqın birliyi silaha qalib gəldi və bu, 20 Yanvarı səciyyələndirən ən mühüm məqamlardan biridir.

Azərbayvan Həmkarlar İttifaqları Konfederasiyası