Dekabrın 29-da Rayon İcra Hakimiyyətinin başçısı Əziz Əzizovun, YAP Beyləqan rayon təşkilatının sədri,rayonun hüquq-mühafizə orqanlarının rəhbərlərinin, Şəhid ailələri və qazilərin, rayonun idarə, müəssisə, təşkilat rəhbərlərinin, ziyalıların-ümumilikdə 500-dən çox şəxsin iştirakı ilə Dünya Azərbaycanlılarının Həmrəyliyi Günü münasibətilə tədbir keçirilib.

 Rayon İcra Hakimiyyətinin təşkilatçılığı ilə keçirilən tədbir Dövlət Himninin səsləndirilməsi ilə açıq elan edilib.Daha sonra bu günün təsisçisi Ümummilli Lider Heydər Əliyevin, torpaqlarımızın azadlığı uğrunda canlarını fəda edən şəhidlərimizin və Bakı-Qroznu istiqamətində uçan Azərbaycan Hava Yollarına məxsus sərnişin təyyarəsinin Aktau şəhəri yaxınlığında qəzaya uğraması nəticəsində həlak olanların xatirəsi bir dəqiqəlik sükutla yad edildi.

 Tədbiri giriş nitqi ilə açan Beyləqan Rayon İcra Hakimiyyətinin başçısı Əziz Əzizov Dünya Azərbaycanlıların Həmrəyliyi Günü və Yeni il münasibətilə tədbir iştirakçılarını təbrik edib, bu əlamətdar günün əhəmiyyətindən, o cümlədən Müzəffər Ali Baş Komandan cənab İlham Əliyevin rəhbərliyi altında qazandığımız tarixi ədalətin zəfər çalmasında xalqımızın göstərdiyi birlik və həmrəyliyin bütün dünyaya sübut olunduğundan söz açıb. Həmçinin, Şəhidlərimizə, eləcə də Azərbaycan Hava Yollarına məxsus sərnişin təyyarəsinin Aktau şəhəri yaxınlığında qəzaya uğraması nəticəsində həlak olanlara Allahdan rəhmət diləyən RİH başçısı Əziz Əzizov tədbirdə iştirak edən şəhid ailələrinə və qazilərə bir daha hörmət və ehtiramını bildirib.

RİH başçısı ötən dövrdə rayonun sosial-iqtisadi, ictimai-siyasi həyatında baş verən yeniliklərdən hesabat xarakterli danışaraq, görüləcək işlərin 2025-ci ildə də davam edəcəyini bildirdi.

 Daha sonra rayonun ictimai-mədəni, eləcə də sosial-iqtisadi həyatında fəal iştirakına görə bir qrup şəxs Rayon İcra Hakimiyyəti başçısının Fəxri Fərmanı ilə təltif olunublar.

 Tədbir Mil-Muğan Regional Mədəniyyət İdarəsinin Beyləqan rayon nümayəndəliyinin sevilən incəsənət xadimlərinin ifaları ilə davam edib.