2020-ci il noyabrın 1-də Vətən müharibəsi Azərbaycan Ordusunun qətiyyətli əməliyyatları və düşmənin artan müqaviməti şəraitində davam edirdi. Müharibənin otuz altıncı günü cəbhədəki döyüşlərlə yanaşı, mülki əhalinin təhlükəsizliyi, hərbi təminat xətlərinə endirilən zərbələr və Azərbaycan-Türkiyə həmrəyliyi ilə də yadda qaldı.

Günün ilk saatlarında Müdafiə Nazirliyi cəbhədəki vəziyyətlə bağlı məlumat yaydı. Bildirildi ki, oktyabrın 31-də və noyabrın 1-nə keçən gecə Ermənistan silahlı qüvvələri cəbhənin müxtəlif istiqamətlərində Azərbaycan Ordusunun mövqelərini və yaşayış məntəqələrimizi artilleriya və raketlərdən atəşə tutub. Ağdərə, Ağdam, Xocavənd və Qubadlı istiqamətlərində döyüşlər davam edib. Azərbaycan bölmələri düşmənin hücumlarının qarşısını alaraq əməliyyat şəraitinə uyğun cavab tədbirləri həyata keçirib. Həmin məlumatda düşmənin canlı qüvvəsinə, zirehli texnikasına, artilleriya vasitələrinə və digər hərbi obyektlərinə vurulan zərbələr barədə də məlumat verilirdi.

Səhər saatlarında Ermənistan silahlı qüvvələri Azərbaycan-Ermənistan dövlət sərhədində yerləşən hərbi mövqelərimizi artilleriya, minaatan və atıcı silahlardan atəşə tutdu. Beləliklə, düşmən cəbhənin müxtəlif istiqamətlərində gərginliyi qoruyub saxlayır, Azərbaycan Ordusunun mövqelərinə təzyiq göstərməyə çalışırdı.

Səhər saatlarından etibarən dinc əhalinin yaşadığı ərazilər də atəşə məruz qaldı. Müdafiə Nazirliyinin yaydığı məlumata görə, Tərtər şəhəri, Şıxarx qəsəbəsi, Qapanlı, Əskipara və Səhləabad kəndləri, həmçinin Ağcabədi rayonunun Yuxarı Qiyaməddinli kəndi intensiv artilleriya atəşinə tutuldu. Yaşayış məntəqələrinin hədəfə alınması mülki insanların həyatını təhlükəyə atır, müharibənin ağır nəticələrini cəbhə xəttindən uzaqda yaşayan insanlara da yaşadırdı.

Azərbaycan Ordusu isə düşmənin hərbi imkanlarını zəiflətmək istiqamətində əməliyyatlarını davam etdirirdi. Günün ilk yarısında Müdafiə Nazirliyi işğal altında olan ərazidə yerləşən Ermənistan silahlı qüvvələrinin hərbi təminatına qarşı zərbələr barədə məlumat yaydı. Bir neçə gün əvvəl raket-artilleriya silahları anbarının məhv edilməsindən sonra düşmən bölmələrində sursat qıtlığının yarandığı bildirilirdi. Noyabrın 1-də döyüş sursatı daşıyan Ermənistan hərbi yük maşınlarının partladılması düşmənin təchizat imkanlarına qarşı görülən tədbirlərin davam etdiyini göstərirdi.

Günün ikinci yarısında Zəngilan istiqamətində gedən döyüşlərdən yeni xəbərlər gəldi. Dövlət sərhədinin Zəngilan rayonu sahəsində zərərsizləşdirilən düşmən bölmələrindən silah və sursat hərbi qənimət kimi götürüldü. Bu, döyüş meydanında əldə edilən nəticələrin yalnız düşmənin canlı qüvvəsi və texnikasının sıradan çıxarılması ilə məhdudlaşmadığını, onun silah-sursat ehtiyatlarının da Azərbaycan Ordusunun nəzarətinə keçdiyini göstərirdi.

Həmin istiqamətdə Azərbaycan bölmələrinin mövqelərini atəşə tutan düşmənə məxsus iki BM-21 “Qrad” yaylım atəşli reaktiv sistemi məhv edildi. Bu sistemlər geniş ərazilərə intensiv atəş açmaq imkanına malik olduğundan onların sıradan çıxarılması düşmənin atəş gücünün zəiflədilməsi baxımından əhəmiyyətli idi.

Günün sonrakı mərhələsində Müdafiə Nazirliyi cəbhənin müxtəlif istiqamətlərində düşmənin iki artilleriya batareyasının məhv edildiyini açıqladı. Bu əməliyyatlar Azərbaycan Ordusunun düşmənin atəş vasitələrini müəyyənləşdirərək onları sıradan çıxarmaq istiqamətində fəaliyyətini davam etdirdiyini göstərirdi.

Axşam saatlarında düşmənin canlı qüvvəsinin məhv edilməsi barədə də məlumat yayıldı. Ardınca, noyabrın 1-də ictimaiyyətə çatdırılan başqa bir açıqlamada Xocavənd istiqamətində Ermənistan silahlı qüvvələrinə məxsus hərbi avtomobil karvanının məhv edilməsi barədə məlumat verildi. Müdafiə Nazirliyinin bildirdiyinə görə, həmin karvanın hərəkəti oktyabrın 31-də havadan müşahidə zamanı qeydə alınmışdı. 

Noyabrın 1-də hərbi əməliyyatlarla yanaşı, Azərbaycanın siyasi-diplomatik fəaliyyəti də davam edirdi. Prezident İlham Əliyev Türkiyənin xarici işlər naziri Mövlud Çavuşoğlunun rəhbərlik etdiyi nümayəndə heyətini qəbul etdi. Görüşdə Azərbaycan-Türkiyə münasibətləri, cəbhədəki vəziyyət və müharibənin davam etdiyi şəraitdə iki ölkə arasındakı həmrəylik məsələləri müzakirə olundu.

Prezident İlham Əliyev Türkiyənin müharibənin ilk günlərindən Azərbaycana göstərdiyi siyasi və mənəvi dəstəyin əhəmiyyətini vurğuladı. O, Azərbaycan Ordusunun əməliyyatlarının uğurla davam etdiyini, Füzuli, Cəbrayıl, Zəngilan və Qubadlı şəhərləri də daxil olmaqla, təqribən 200-ə yaxın yaşayış məntəqəsinin işğaldan azad edildiyini bildirdi. Dövlət başçısı Azərbaycanın əsas məqsədinin ərazi bütövlüyünü bərpa etmək olduğunu bir daha bəyan etdi.

Görüşdə Ermənistanın elan olunmuş atəşkəsləri pozması, Gəncə və Bərdənin raket və digər silahlarla atəşə tutulması, dinc əhali arasında itkilərin olması da diqqətə çatdırıldı. Prezident müharibənin davam etməsinə görə məsuliyyətin Ermənistan rəhbərliyinin üzərinə düşdüyünü bildirdi və Azərbaycanın öz ərazi bütövlüyünü bərpa etmək əzmində olduğunu vurğuladı.

Türkiyənin xarici işlər naziri Mövlud Çavuşoğlu isə Prezident Rəcəb Tayyib Ərdoğanın salamlarını çatdıraraq Türkiyənin Azərbaycanı tək qoymamaq və onunla həmrəy olmaq mövqeyini ifadə etdi. O, Azərbaycanın döyüş meydanındakı uğurlarını yüksək qiymətləndirdi. Görüş bir daha göstərdi ki, Vətən müharibəsi günlərində Azərbaycan-Türkiyə münasibətləri siyasi bəyanatlarla məhdudlaşmır, qarşılıqlı mənəvi dəstək və həmrəylik əsasında davam edirdi.

Noyabrın 1-də cəbhədən gələn xəbərlər Azərbaycan Ordusunun düşmənin canlı qüvvəsinə, artilleriya sistemlərinə və hərbi təminat vasitələrinə qarşı ardıcıl əməliyyatlar apardığını göstərirdi. Digər tərəfdən, Ermənistan silahlı qüvvələrinin yaşayış məntəqələrimizi atəşə tutması mülki əhalinin təhlükəsizliyini müharibənin ən ağrılı məsələlərindən biri olaraq saxlayırdı.

Vətən müharibəsinin otuz altıncı günü Azərbaycanın hərbi və siyasi iradəsinin eyni məqsədə - ölkənin ərazi bütövlüyünün bərpasına yönəldiyini nümayiş etdirdi. Cəbhədə hərbi üstünlüyün möhkəmləndirilməsi, beynəlxalq müstəvidə Azərbaycanın haqlı mövqeyinin ifadə olunması və xalqın orduya dəstəyi mübarizənin əsas dayaqları idi. Qarşıda hələ ağır sınaqlar olsa da, Azərbaycan Ordusu qələbəyə doğru inamla irəliləyirdi.