Prezident Kitabxanasında Yeni Azərbaycan Partiyası (YAP) Səbail rayon təşkilatı və Prezident Kitabxanasının birgə təşkilatçılığı ilə “Biz Azərbaycan xalqının Ümummilli Lideri Heydər Əliyevin elmi-siyasi irsini öyrənirik” adlı məktəb çərçivəsində tədbir keçirilib. Kitabxanadan bildirilib ki, əvvəlcə iştirakçılar Prezident Kitabxanasının fəaliyyəti, zəngin fondları və oxucular üçün yaradılmış müasir rəqəmsal imkanlarla yaxından tanış olublar.Tədbirdə çıxış edən Yeni Azərbaycan Partiyası Səbail rayon təşkilatının sədri Muxtar Nağıyev Ümummilli Lider Heydər Əliyevin Azərbaycan dövlətçiliyinin möhkəmləndirilməsi, milli-mənəvi dəyərlərin qorunması və Azərbaycançılıq ideologiyasının formalaşdırılmasındakı müstəsna xidmətlərindən bəhs edib. Qeyd olunub ki, Ulu Öndərin müəyyən etdiyi inkişaf strategiyası bu gün də ölkənin tərəqqisinin əsas istiqamətlərindən biri olaraq qalır.

Prezident Kitabxanasının direktoru, professor Afət Abbasova çıxışında Heydər Əliyevin zəngin siyasi və elmi irsinin öyrənilməsinin və gənc nəslə çatdırılmasının vacibliyini vurğulayıb. O, Prezident Kitabxanasının bu istiqamətdə həyata keçirdiyi layihələr, elektron informasiya resursları və maarifləndirici tədbirlər barədə ətraflı məlumat verib. Daha sonra Ümummilli Liderin həyat və fəaliyyətindən, onun Azərbaycançılıq məfkurəsinin formalaşmasındakı tarixi xidmətlərindən bəhs edən videoçarx nümayiş etdirilib. Şair-bəstəkar İzolda Babayeva çıxış edərək gənclər arasında vətənpərvərlik hisslərinin aşılanması, milli məfkurəyə bağlılıq mövzusunda ürək sözlərini bölüşüb və tədbirin əhəmiyyətini yüksək qiymətləndirib. Tədbir çərçivəsində Prezident Kitabxanası tərəfindən hazırlanmış “Heydər Əliyev. Elektron sənədlər toplusu” adlı genişmiqyaslı elektron layihə təqdim olunub. Bildirilib ki, layihə Ümummilli Liderin zəngin irsinin rəqəmsal məkanda qorunması, sistemləşdirilməsi və gələcək nəsillərə ötürülməsi baxımından mühüm elmi-informasiya mənbəyidir.

Sonda Prezident Kitabxanasının direktoru, professor Afət Abbasova tələbələri maraqlandıran sualları cavablandırıb. İnteraktiv formada keçən bu hissədə tələbələr tərəfindən rəqəmsallaşma mühitində müasir kitabxana fəaliyyətinin təşkili və Ulu Öndər Heydər Əliyevin Azərbaycan dilinin qorunması, inkişafı istiqamətində yürütdüyü uzaqgörən dil siyasəti ilə bağlı verilən suallar ətrafında geniş fikir mübadiləsi aparılıb.