Prokurorluq orqanlarında etik davranış qaydalarına və nümunəvi dövlət qulluqçusu kimi peşəkar davranış tələblərinə riayət olunmasına böyük önəm verilir.

Bu məqsədlə, Baş Prokurorluğun Elm-Tədris Mərkəzi və Kadrlar idarəsinin birgə təşkilatçılığı ilə 2025-ci ilin may ayı ərzində prokurorluq orqanlarında xüsusi rütbəsi olmayan vəzifələrdə çalışan dövlət qulluqçuları üçün “Dövlət qulluğunda etik davranış qaydaları və prinsipləri” mövzusunda distant təlimlər keçirilib.

Təlimlərdə 400-dən artıq dövlət qulluqçusu dinləyici kimi iştirak edib, Baş Prokurorluğun etik davranış qaydaları sahəsində nəzəri və praktiki biliklərə malik əməkdaşları isə təlimçi qismində cəlb olunub.

Mühazirə və təqdimat formatında keçirilmiş təlimlərdə “Konstitusiya və Suverenlik İli” münasibətilə dövlətçilik tarixində yeni mərhələ, etik davranış qaydalarının mahiyyəti, dövlət qulluqçularından gözlənilən davranış modeli və tələblər, sosial mediada dövlət qulluqçularının davranışının etik xüsusiyyətləri, həmçinin kollektiv daxili ünsiyyət qaydaları mövzuları geniş şəkildə müzakirə olunub.