Azərbaycan Mətbuat Şurasında keçirilən növbəti yubiley mərasimində milli jurnalistika məktəbimizin istedadlı və nüfuzlu yetirməsi, Əməkdar dövlət qulluqçusu İsrafil Qurbanovun anadan olmasının 75 illiyi həmkarları, dostları və doğmalarının əhatəsində sevgi-sayğı ilə ilə qeyd edildi.

Lider-meia.az "Xalq" qəzetinə istinadla xəbər verir ki, İsrafil Qurbanovu media ictimaiyyəti adından səmimi təbrik edən MŞ sədri Rəşad Məcid jurnalist peşəsini həmişə uca tutduğuna, dövlət qulluqçusu kimi çoxillik xidməti zamanı da ölkə mediası ilə sıx əlaqə saxladığına görə təltif edildiyi yubiley diplomunu İsrafil Qurbanova təqdim etdi. Şura rəhbəri yubilyarın zəngin və mənalı ömür yoluna nəzər salaraq onun uzun illər ali dövlət qurumlarında kargüzarlığın, informasiya-nəşriyyat fəaliyyətinin ana dilimizdə qurulmasında fəal iştirak etdiyini məmnunluqla qeyd etdi. O bildirdi ki, İsrafil Qurbanov rəsmi həyatın ölkə mediasında yüksək peşəkarlıqla əks olunması ilə bağlı fəaliyyətini bu sahədə yetirmələri örnək kimi qəbul ediblər.

Məclisin təşkilatçısı olan Ahıl Jurnalistlər Məclisinin sədri, “Xalq qəzeti”nin baş redaktor müavini Tahir Aydınoğlu yubiliyarın bioqrafiyası barədə ətraflı məlumat verərək bildirdi ki, 1973-cü ildə Bakı Dövlət Universitetinin jurnalistika fakültəsini yüksək təhsil uğurları ilə bitirmiş İsrafil Qurbanov orduda 2 illik zabit xidmətdən sonra peşə fəaliyyətinə Azərbaycan Jurnalistlər Birliyinin “Müxbir” bülletenində başlayıb. Azərbaycan və rus dillərində tarixi materiallarla sərbəst işləmək bacarığına görə həmkarımız Azərbaycan KP MK yanında Partiya Tarixi İnstitutuna baş elmi işçi vəzifəsinə irəli çəkilib.

İstedadlı, məsuliyyətli və çalışqan jurnalist kimi həmkarımız 1981–1989-cu illərdə Azərbaycan SSR Ali Soveti Rəyasət Heyəti aparatında böyük məsləhətçi vəzifəsində çalışarkən rəsmi materialların Azərbaycan dilində hazırlanmasına və nəşr edilməsinə layiqli töhfə verib. 1989–1991-ci illərdə Azərbaycan KP MK-da kargüzarlıq ana dilimizdə təşkil ediləndə İsrafil Qurbanov bu sahədə təcrübəli praktik dil mütəxəssisi kimi partiya aparatının ümumi şöbəsinə təlimatçı vəzifəsinə gətirilib. O, 1991-ci ildən başlayaraq yeni formalaşan Azərbaycan Respublikası Prezidenti Administrasiyasında məsləhətçi, sektor müdiri, 2007-ci ildən isə şöbə müdirinin müavini vəzifələrində nümunəvi xidmət göstərib.

Çoxillik səmərəli fəaliyyəti zamanı İsrafil müəllim Azərbaycan SSR Ali Soveti Rəyasət Heyətinin Fəxri Fərmanına, “Dövlət qulluğunda fərqlənməyə görə” və “Azərbaycan Xalq Cümhuriyyətinin 100 illiyi” medallarına, dövlət qulluğunda uzunmüddətli səmərəli xidmətinə görə 3-cü və 2-ci dərəcəli “Vətənə xidmətə görə” ordenlərinə, “Əməkdar dövlət qulluqçusu” fəxri adına layiq görülüb.

Ahıl Jurnalistlər Məclisinin sədr müavini Əminə Yusifqızı, türkoloq-folklorşünas Əli Şamil, AMEA-nın Ədəbiyyat İnstitutunun redaktoru Maral Poladova, yubilyarın tələbəlik yoldaşlarından Əməkdar jurnalist Rəhim Hüseynzadə, Kinemotoqrafçılar İttifaqının redaktoru Akif Cabbarlı, jurnalistlər Əzizə Şamil, Elmira Qurbanova, Məsaim Abdullayev, Şərif Kərimli, Fuad Babayev, İmran Bədirxanlı, Şöhlət Abbas yubilyarın nüfuzlu jurnalist və dövlət qulluqçusu kimi yarım əsrlik fəaliyyətinin Vətənə xidmətin dəyərli nümunəsi olduğunu söylədilər.

Türkiyəli ədəbiyyatşünas Seyfəddin Altaylı, şərqşünas-diplomat Abbasəli Həsənov, diaspor fəalı Qənimət Səfərov, bioloq alim Mədət Qurbanov, iqtisadçı alim Ülvi Bayramov, həkim-cərrah Gəray Qurbanov, yubilyarın qızı Elnurə Qurbanova və başqaları İsrafil Qurbanovu fədakar vətəndaş və sadiq dost, qayğıkeş insan və gözəl ailə başçısı kimi səciyyələndirdilər.

Sonda çıxış edən İsrafil Qurbanov keçdiyi ömür yoluna və fəaliyyətinə verilən yüksək dəyərə görə MŞ rəhbərliyinə və məclis iştirakçılarına səmimi təşəkkürünü çatdırdı. O bildirdi ki, bundan sonra da doğma jurnalistika xidmətini davam etdirmək üçün həvəslə çalışacaq, yarımçıq qalmış mövzuları üzərində işləyəcək, yeni axtarışlar aparacaq.