Fevralın 7-də Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü ilə keçirilən “Talassemiyasız həyat naminə” proqramı çərçivəsində Dövlət Turizm Agentliyində qurumun və tabe orqanların əməkdaşlarının iştirakı ilə könüllü qanvermə aksiyası keçirilib.

Aksiyanın məqsədi hemofiliya və talassemiya kimi irsi qan xəstəliklərinə qarşı mübarizəyə dəstək vermək və təcili əməliyyata ehtiyacı olan insanların qan ehtiyatına əlçatanlığını təmin etməkdir.

Qanvermə prosesinə Səhiyyə Nazirliyinin Milli Hematologiya və Transfuziologiya Mərkəzinin nəzdindəki Mərkəzi Qan Bankının ixtisaslaşmış tibb briqadası rəhbərlik edib.Həkim heyəti ilk olaraq qan vermək istəyən əməkdaşların səhiyyə vəziyyətini qiymətləndirib. Daha sonra qanvermə prosesinin təhlükəsizliyini təmin etmək məqsədilə terapevtik müayinələr aparılıb, əməkdaşlardan anamnez toplanıb. Bundan sonra təzyiq, nəbz, bədən hərarəti, çəki və boy kimi göstəricilər yoxlanılıb, qandakı hemoqlobin səviyyəsi müəyyən edildikdən sonra donorların qan verməsinə icazə verilib.
Donorların qan nümunələri laboratoriyalarda yoxlama prosesindən keçdikdən sonra qan xəstəlikləri olan insanlar üçün Mərkəzi Qan Bankında toplanacaq.