Tədbirdə Azərbaycan Respublikasının Gənclər və İdman naziri Fərid Qayıbov, federasiyanın prezidenti Elçin Quliyev, idarə heyətinin üzvləri və dəvət olunmuş qonaqlar iştirak etmişdir.

Azərbaycan Respublikası Atçılıq Federasiyasından verilən məlumata görə, gənc nəsilin sağlam ruhda yetişdirilməsi üçün Azərbaycan Respublikasının Prezidenti cənab İlham Əliyev və Birinci vitse-prezident xanım Mehriban Əliyevanın ölkəmizdə idmanın inkişafına göstərdiyi diqqət və qayğı federasiyanın prezidenti Elçin Quliyevin açılış nitqində xüsusi olaraq vurğulanmışdır. 

Federasiya prezidenti milli idman irsini inkişaf etdirmək, beynəlxalq səviyyədə uğur qazanmaq və atçılıq idmanını ölkədə daha geniş yaymaq üçün səy göstəriləcəyinə əminlik ifadə etmişdir.

Tədbirin davamında federasiyanın baş katibi Bəhruz Nəbiyev tərəfindən 2024-cü ilin ən yaxşılarının mükafatlandırılma mərasimi təşkil olunmuşdur. 

Mükafatlar müxtəlif nominasiyalar üzrə təqdim edilmişdir:

• İlin Ədalətli Yarış Hakimi – Tahirov Zaur Aydın oğlu;
• Cıdır üzrə İlin Jokeyi – Nəzərov Hilal Mehman oğlu;
• Cıdır üzrə İlin Qarabağ atının yetişdirici Klubu – Buta Qolden Atçılıq Klubu;
• Cıdır üzrə İlin Dilbaz atının yetişdirici Klubu – Xan-Xan Atçılıq Klubu;
• Çövkən üzrə İlin Klubu – Sərhədçi Çövkən Komandası;
• Çövkən üzrə İlin Oyunçusu – Primov Samir Soltan oğlu;
• Konkur üzrə İlin İdmançısı – Musayev Seyid Yaqub oğlu;
• Konkur üzrə İlin Gənc İdmançısı – Mirzəyeva Leyla Elxan qızı;
• Konkur üzrə İlin Xanım İdmançısı – Ağayeva Aydan Aydın qızı;
• Konkur üzrə İlin Məşqçisi – Musayev Seyid Yaqub oğlu;
• Konkur üzrə İlin Klubu – Elit Atçılıq İdman Klubu;
• Gənclər arasında Konkur üzrə İlin Klubu – Respublika Atçılıq Məktəbi;
• Yorğa atçılığı üzrə İlin At sahibi – Cabarov Elmətdin Nazim oğlu;
• Yorğa atçılığı üzrə İlin Çaparı – Allahverdiyev Xəlil Elman oğlu;
• Dresaj üzrə İlin İdmançısı – Əlibəyov Aydın Alavəddin oğlu;
• İlin Baytar Həkimi – Musayev Məhəmməd Yaqub oğlu;
• İlin İdman Kanalı – CBC SPORT telekanalı;
• İlin Şərhçisi – Mirzəzadə Ramiz Rasim oğlu;
• Çövkən üzrə ilin ən baxımlı qolunun sahibi – Əliyev Rusif Nazim oğlu;
• Dresaj üzrə İlin Xanım İdmançıları – Zəhrabəyova Aqata Eduard qızı və Zəhrabəyova Karina Eduard qızı.

Mükafatlandırma mərasimindən sonra Gənclər və İdman naziri Fərid Qayıbov çıxış edərək Azərbaycan Atçılıq Federasiyasının 2024-cü il ərzində əldə etdiyi uğurları yüksək qiymətləndirmiş, atçılıq sahəsində görülən işlərin Azərbaycanın milli idman irsini inkişaf etdirməkdə mühüm rol oynadığını vurğulayaraq federasiyanın beynəlxalq səviyyədə uğur qazanmaq və ölkəmizi layiqincə təmsil etmək istiqamətində həyata keçirdiyi təşəbbüslərin əhəmiyyətindən danışmışdır.

Tədbirin ikinci hissəsində keçirilən iclasda 2025-ci il üçün federasiya qarşısına qoyulan hədəf və məqsədlər açıqlanmış, növbəti ilin planları müzakirə olunmuş və keçiriləcək tədbirlər, eləcə də yarışlar haqqında ətraflı məlumat təqdim edilmişdir.

Tədbir iştirakçıları 2024-cü ilin uğurlarını qeyd edərək, növbəti ildə yeni zirvələrə çatmaq əzmini ifadə etmişlər.

Hazırkı baş katib Bəhruz Nəbiyev Beynəlxalq Çövkən Federasiyasına prezident seçildiyinə görə, Azərbaycan Respublikası Atçılıq Federasiyasının yeni baş katibi vəzifəsinə yeganə namizəd olaraq Emil Seyidov irəli sürülmüşdür. Səsvermənin nəticələrinə əsasən, Emil Seyidov Azərbaycan Respublikası Atçılıq Federasiyasının yeni baş katibi seçilmişdir.