Azərbaycan Həmkarlar İttifaqları Konfederasiyasının üzvü Təhsil İşçiləri Azad Həmkarlar İttifaqı Respublika Komitəsinin (ATİAHİ RK) dəstəyi, “Yonca” Estetik İnkişaf Mərkəzinin və “Zəfər sədası” xor qrupunun təşkilatçılığı ilə Şəhriyar adına Mədəniyyət Mərkəzində “Möcüzələr diyarına...” adlı tamaşanın premyerası keçirilib.Öncə Dövlət Himni səsləndirilib, Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.Sonra Ümummilli Lider Heydər Əliyevin uşaqlarla bağlı səsləndirdiyi fikirlər əsasında hazırlanmış videoçarx  nümayiş olunub.“Yonca” Estetik İnkişaf  Mərkəzinin təsisçisi Lalə Zahir tamaşanın mahiyyətindən bəhs edib.  Vurğulayıb ki, Vətən uğrunda canından keçən qəhrəmanlarımızın xatirəsini əziz tutmaq, şəhidlərimizin övladlarının vaxtlarının səmərəli keçirilməsi, istedadlarının üzə çıxarılması və milli ruhda yetişdirilməsi naminə çalışmaq hər birimizin borcudur.
Mərasimdə Milli Məclisin deputatı Vüqar İskəndərov çıxış edərək Vətənimiz, torpaqlarımız uğrunda canından keçən igidlərimizin qəhrəmanlığından söz açıb. Qeyd edib ki, Vətən müharibəsində qəhrəmanlıq göstərən şəhidlərimizin uşaqları unudulmur: “Şəhid və qazi ailələri, onların övladları dövlətimizin xüsusi diqqət və qayğısı ilə əhatə olunur. Şəhid yadigarları Vətənə əmanətdir.” 
Çıxışının sonunda Vüqar İskəndərov tədbirin təşkilatçılarına, tamaşanın hazırlanmasında əməyi olan hər kəsə minnətdarlığını bildirib.Sonra "Möcüzələr diyarına..." adlı tamaşa nümayiş olunub. “Zəfər sədası” xor qrupundan ibarət şəhid övladları ilk dəfə olaraq səhnədə aktyor kimi çıxış ediblər.
5-14 yaşlı uşaqlar səhnələşdirdikləri rollar vasitəsilə müxtəlif nağıl qəhrəmanlarını canlandırıblar. Tamaşa iki uşağın - Cəsur və Ziynətin nənələri ilə söhbətlə başlayır. Tamaşanın baş qəhrəmanları bir neçə zamana səyahət edərək maraqlı personajlarla tanış olurlar.  Müxtəlif  nağıl qəhrəmanlarının olduğu  möcüzələr diyarına düşən uşaqlar canlandırdıqları obrazlarla birgə maraqlı oyunların iştirakçısı olurlar. Tamaşadan sonra “Zəfər Sədası” xor qrupu tərəfindən şanlı Ordumuzun Zəfər tarixindən və milli mənəvi dəyərlərimizdən bəhs edən şeirlər, musiqilər səsləndirilib.
Sonda tədbirdə  iştirak edən 500-dən  çox  uşağa ATİAHİ RK tərəfindən hədiyyələr təqdim olunub.