Bakı - müstəqil, azad bir məmləkətin baş şəhəri - qürur yerimiz! Hər daşı-divarı bir tarix danışan, gözəlliyi ilə göz oxşayan Bakımız bu gün dünyanın möcüzəli şəhərlərindən birinə çevrilib. Tam fərqli bir Bakı var indi gözlərimizin önündə: gündən-günə dəyişən, yeniləşən, böyüyən, abadlaşan şəhər. Geniş və yaraşıqlı küçələr, nəhəng göydələnlər, çoxmərtəbəli yaşayış binaları, abad yollar, gümüş kəmər kimi şəhərin belinə dolanan möhtəşəm körpülər, yamyaşıl meydanlar, əsrarəngiz park və xiyabanlar, bağlar, musiqili fəvvarələr...

Gündüzləri bir aləmdir bu şəhərin, cənnəti xatırladır. Bu "cənnət"in cazibəsindən qopmaq olmur. Gecələri bir başqa möcüzədir, şam-çıraqdır - göydəki ulduzlar sanki şəhərə qonub. Qızıl-qızıl düymələrə dönüb gecənin yaxasından asılar Bakının sayrışan işıqları: qaranlığın bağrını yarar, zülmətə qənim kəsilər, göydəki ulduzlarla bəhsə girər, ağappaq işığa qərq edər dörd bir yanı. Göy üzü də heyran olar yerdəki bu füsunkarlığa, qibtə edər Bakı gecəsinin təntənəsinə.

Bakının gözəlliyinə hər gün yeni çalarlar əlavə olunur: bunu hamı görür və etiraf edir. Çünki bu quruculuq, sürətli yeniləşmə, hərtərəfli inkişaf gözlərimizin önündə baş verir. Paytaxtımızı qədirbilən insanlar yenidən qurur: bir vaxtlar Bakını əzəmətli yadigarları ilə gözəlləşdirən ulu öndər Heydər Əliyevin əməllərini bu gün Prezident İlham Əliyev davam etdirir. Dövlətimizin başçısı hələ 2004-cü il aprelin 2-də şəhərin baş planı ilə tanış olarkən "Bakı gözəl, təmiz, abad, yaşıllaşdırılmış şəhər olmalıdır" deyərək hətta hər binanın, hər məhəllənin, hər küçənin özünəməxsus olmasını, mövcud yaşıllıqların qorunmasını, bağ və parkların, istirahət guşələrinin yaradılmasını tövsiyə etmişdi. Nəticə özünü çox gözlətmədi. Bu tövsiyə və tapşırıqlar böyük tarixi hadisələrə şahidlik edən Bakıya yeni gözəllik bəxş etdi.

Köhnə, balaca evlərin yerində ucaldılan göydələnlər şəhərin simasına yaraşıq verir, onun memarlıq quruluşuna əlavə çalarlar qatır. Milliliyi, qədimliyi, memarlıq üslubu və ənənələri qorunmaqla təmir olunan monumental binalar, memarlıq inciləri, muzeylər, teatrlar, yeni tikilən modern mədəniyyət ocaqları şəhərin mənəvi zənginliyindən xəbər verir. Dünyanın ən mürəkkəb memarlıq layihələri əsasında inşa olunan nəhəng tikililər: "Alov qüllələri", Heydər Əliyev Mərkəzi, "Bakı Kristal Zal", Bayraq meydanı şəhərin mənzərəsinə əzəmət gətirir, müasirlik, yenilik bəxş edir. Dünyanın diqqətini cəlb edən Bakı indi ən mötəbər beynəlxalq tədbirlərin, idman yarışlarının keçirildiyi məkandır. Şəhərimizə təşrif buyuran qonaqlar isə Bakının gözəlliyi qarşısında heyrətlərini gizlədə bilmirlər...

Son dörd ildə böyük qələbələr sevinci yaşayan xalqımızın qəlbi bu günlər daha bir fəxarət hissilə döyünür. Bakıda dünyanın bütün dövlətlərini, eləcə də ən nüfuzlu beynəlxalq təşkilatları bir araya gətirən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının 29-cu sessiyası (COP29) kimi mötəbər tədbirin keçirildiyi günlərdə parklar, xiyabanlar, xüsusilə şəhərimizin milli simvoluna dönən Milli Park və Zəfər Parkı insanların daha çox üz tutduqları məkanlardır. Bu günlərdə Zəfər Parkına yollandım. Gördüyüm mənzərə məni çox heyrətləndirdi. İnsan əlindən tərpənməyə yer yox idi. Bu həm də ölkəmizin ev sahibliyi etdiyi COP29 çərçivəsində Azərbaycana gələn turistlərin sayının artması ilə əlaqədardır. Mötəbər tədbirə qatılan müxtəlif xalqların, millətlərin nümayəndələri Azərbaycanın əsrarəngiz paytaxtını öz gözləri ilə görürlər. Parkda gəzən bir neçə turistin təəssüratlarını öyrəndim. Onlar tədbirdə iştirak etməklə yanaşı, milli-mənəvi dəyərlərimizə - musiqimizə, yeməklərimizə böyük maraq göstərdiklərini və paytaxtımızın arxitekturasını bəyəndiklərini bildirdilər. Qeyd etdilər ki, dünyanı narahat edən qlobal məsələlərin Bakıda müzakirə olunması Azərbaycana olan inamı göstərir.

"Mən bura gələndə elə bilirdim, Bakı ancaq neft qoxulu bir şəhərdir. Yanılmışam. Bakıdan əsl mədəniyyət qoxusu gəlir. Xəzərin sahilindəki unikal şəhəriniz, buradakı qədimlik və müasirlik məni valeh etdi. Şəhəriniz çox təmiz və gözəldir, onun gecələri lap nağıllar aləmini xatırladır. Ailəmiz üçün çoxlu hədiyyə almışam, bu hədiyyələrdə Bakının gözəlliyi əks olunub", - deyə Zəfər Parkı, Dənizkənarı Milli Park, unikallığı ilə seçilən İçərişəhər və Qız qalasına heyranlığını gizlətməyən macarıstanlı turist Mariya Dunayi söylədi.

Qeyd edək ki, paytaxtın inkişaf strategiyasına uyğun aparılan quruculuq Bakının bütün rayonlarını əhatə edir, bu isə özlüyündə şəhərimizin kompleks inkişafının təminatıdır. Hərəkət isə irəliyə doğru addım deməkdir! Elə bir gün yoxdur ki, Bakıda, yaxud bölgələrimizdə hansısa yeni müasir obyektin açılışı olmasın! Müstəqil ölkəmizin rəhbəri hər bir yeni layihənin təməl daşını özü qoyur, açılışını da özü edir. Axı bu tədbirlərin nəticələrindən hər bir Azərbaycan vətəndaşı faydalanır, bu abadlıq, bu quruculuq insanların sağlamlığına, rahatlığına, dincliyinə xidmət edir. Yaradılan gözəllik hamı üçündür. Biz bu cür möhtəşəm şəhərdə yaşadığımıza görə dövlət başçımıza minnətdar olmalıyıq. Şəhərimizə sığal çəkən əllərə, bu gözəlliyi yaradanlara "əhsən" deməliyik.

Bu gün hər birimiz iftixar hissilə deyirik: "Bura Bakıdır - bizim sevimli şəhərimiz!". COP29 kimi beynəlxalq konfransa yüksək səviyyədə ev sahibliyi edir. Bununla da tariximizin, mədəniyyətimizin mərkəzi, mənəviyyatımızın paytaxtı, taleyimizin şəhəri olan Bakımızın füsunkar gözəlliyi iki həftə ərzində dünyanın mərkəzinə çevrilməklə yaddaşlara əbədi həkk olunacaq.

Nurəngiz ADİLQIZI.