Ermənistanın baş naziri Nikol Paşinyan yenə də havadarlarından Fransaya üz tutub. İlk növbədə bir məqama xüsusi diqqət etmək lazımdır. Azərbaycandan fərqli olaraq, Ermənistan heç bir zaman təhlükəsizliyini özü təmin etməyib. Hətta torpaqlarımızı işğal etdiyi dövrdə belə təhlükəsizliyini kənar dövlətlərin hesabına möhkəmləndirməyə çalışıb.

Vətən müharibəsindən sonra Paşinyan hesab etdi ki, Ermənistana yeni qarant qüvvə lazımdır və bu vaxta qədər həyata keçirdikləri siyasət artıq işləmir. Ona görə də regiondan qovulan Minsk qrupunun həmsədrləri - Fransa və ABŞ-ı fərqli ampluada bölgəyə qaytarmaq qərarı verdi. Bu dəfə həmin ölkələr müxtəlif missiyalarla və yalnız Ermənistan ərazisində möhkəmlənməyə başladılar.

Fransa Ermənistana həm maddi, həm də hərbi yardımlarını dəfələrlə artırıb. Makron hökuməti Ermənistanı hərbiləşdirməklə oradakı revanşist qüvvələri Azərbaycana qarşı yeni müharibəyə həvəsləndirir. Fransa hesab edir ki, regionda qalmasının tək yolu Ermənistana inteqrasiya etməkdir. Çünki Azərbaycan heç bir xarici qüvvəni öz ərazisinə buraxmır və ölkənin suverenliyini yüz faiz öz nəzarəti altında saxlayır.

Bir vacib məqamı da unutmaq olmaz ki, Vətən müharibəsində qələbəmiz təkcə işğalçının deyil, həm də işğalçını həvəsləndirən bəzi siyasi liderlərin məğlubiyyəti idi. Fransa prezidenti Emmanuel Makron müharibənin ilk günlərindən Azərbaycana qarşı təzyiqlər göstərməyə çalışdı, ölkəmiz əleyhinə BMT Təhlükəsizlik Şurasında 5 qətnamə layihəsi irəli sürdü. Buna baxmayaraq, Ali Baş Komandan İlham Əliyevin rəhbərliyi ilə müzəffər ordumuz qələbə qazandı. Ermənistanın məğlubiyyətini Makron şəxsi uğursuzluğu kimi qəbul etdiyindən, müharibədən 4 il keçməsinə baxmayaraq, Azərbaycan əleyhinə səylərini dayandırmır.

Unutmaq olmaz ki, Hayastanın hərbiləşdirilməsi erməni xalqının növbəti faciəsinin başlanğıcıdır. Onlar həmişəki kimi, kənar qüvvələrin əlində alət olmaqda davam edirlər.

Pərvanə VƏLİYEVA,

Milli Məclisin deputatı.