Strateji və coğrafi cəhətdən əlverişli ərazidə yerləşən, Şərqlə Qərbi birləşdirən, mühüm tarixi ticarət yollarının keçdiyi, zəngin resurslara malik Azərbaycan tarixən işğalçıların hücumlarına məruz qalmış, talan edilmiş, dəfələrlə parçalanmışdır. Lakin elə bir gün gəldi ki, Azərbaycana da günəş doğdu, qaranlıq səmasından qara buludlar dağıldı. O günəş ki, parlaq işıqları ilə xalqımızın ümidinə çevrildi. O günəş Azərbaycanın xilaskarı - Ümummilli Lider Heydər Əliyev idi.

Ulu öndər Heydər Əliyev müasir Azərbaycanın formalaşmasında mühüm rol oynayan - ölkəmizi 1990-cı illərin əvvəllərində siyasi xaos və qeyri-sabitlikdən çıxaran milli xilaskarımızdır. 1993-cü il oktyabrın 3-də dahi şəxsiyyət Heydər Əliyevin Prezident seçilməsi ölkədə ictimai asayişin bərpası, siyasi sabitliyin və təhlükəsizliyin tam təmin olunması ilə tarixdə qaldı. Ulu Öndər hadisələrə praqmatik yanaşan, Azərbaycanın taleyini düzgün qiymətləndirən və uzunmüddətli uğurlu qərarlar qəbul edən siyasi lider idi.

Ümummilli lider Azərbaycanın milli ideologiyasını - azərbaycançılıq məfkurəsinin əsasını qoymuşdur. Bu ideologiya təkcə ölkə daxilində deyil, həm də dünyada yaşayan bütün azərbaycanlıları birləşdirən milli məfkurədir. Ulu Öndər milli-mənəvi dəyərlərə xüsusi önəm verən, dövlət müstəqilliyinin qorunması və gücləndirilməsi uğrunda mübarizə aparan dahi lider idi. Azərbaycanın ərazi bütövlüyünün bərpası və suverenliyinin möhkəmləndirilməsi yolunda böyük işlər görmüşdür.

Ulu Öndərin uğurlu diplomatiyası sayəsində ölkəmizin beynəlxalq aləmdə mövqeyi güclənmişdir. O, Azərbaycan həqiqətlərini dünya ictimaiyyətinə çatdırmış, xüsusilə Ermənistan-Azərbaycan münaqişəsinin ədalətli həlli üçün ciddi səy göstərmişdir. Heydər Əliyevin diplomatik uğurları Azərbaycanın beynəlxalq təşkilatlarla əməkdaşlığını genişləndirmiş və ölkənin nüfuzunu artırmışdır.

Əzmkar və qətiyyətli lider neft strategiyasının həyata keçirilməsində mühüm rol oynamış, ölkəyə böyük investisiya axınını stimullaşdırmış və Azərbaycanın beynəlxalq iqtisadi sistemdəki yerini müəyyənləşdirmişdir. Onun neft strategiyası sayəsində 30 il öncə imzalanmış "Əsrin müqaviləsi" Azərbaycanın enerji sektorunda mühüm nailiyyətlərə səbəb olmuş, iqtisadi inkişafının əsas dayağına çevrilmişdir. Uzaqgörən siyasətçi Heydər Əliyev Azərbaycanın müasir hüquqi və demokratik dövlət kimi qurulmasında və inkişafında əvəzsiz xidmət göstərmişdir. Onun rəhbərliyi ilə Konstitusiya qəbul edilmiş, vətəndaş hüquq və azadlıqları təmin olunmuş, demokratik islahatlar həyata keçirilmişdir. O, ölkəni iqtisadi tərəqqi yoluna çıxarmış, dayanıqlı inkişaf modeli yaratmış və Azərbaycanın strateji maraqlarını beynəlxalq səviyyədə müdafiə etmişdir.

Ulu Öndərin yürütdüyü uğurlu siyasəti cənab Prezident İlham Əliyev müvəffəqiyyətlə davam etdirir. Bu gün Azərbaycan xalqı liderinə inanır və arxalanır, çünki 30 il sonra ata vəsiyyətini yerinə yetirən Ali Baş Komandan milyonlarla azərbaycanlını öz doğma ata-baba yurduna qaytardı, ölkəmizin qanayan yarası - Qarabağ işğaldan azad edildi, həsrətə son qoyuldu. Ölkəmizin ərazi bütövlüyü və suverenliyi cənab İlham Əliyevin uğurlu hərbi və siyasi rəhbərliyi ilə bərpa edildi. Azərbaycan xalqı liderinin ətrafında bir yumruq kimi birləşdi. Ulu Öndərin varisi, dünya hərb tarixinə torpaqları geri qaytaran lider kimi adını yazdırmış cənab Prezident İlham Əliyev Azərbaycan xalqının dayağı və güvənidir.

Pərvanə VƏLİYEVA,

Milli Məclisin deputatı.