Olimpiya Xartiyasında qeyd edilir ki, "Olimpiya hərəkatının məqsədi insan ləyaqətinin qorunmasına xidmət edən dinc bir cəmiyyəti təşviq etmək üçün idmanı bəşəriyyətin harmonik inkişafına yönəltməkdir". Beynəlxalq hüquqi pozuntuları, neokolonial siyasəti, irqçilik, diskriminasiya, islamofobiya, insan hüquqlarının məhdudlaşdırılması kimi fəaliyyəti ilə qlobal miqyasda tanınan Fransanın belə bir tədbirə ev sahibliyi etməsi də çox absurtdur. 3 min ilə yaxın tarixi olan Olimpiya Oyunlarını siyasi alətə çevirən Fransa hakimiyyəti təşkilatçılıqda ciddi nöqsanlar buraxıblar.

İyulun 27-də Paris-2024 Yay Olimpiya Oyunlarının açılış mərasimi keçirildi. Makron hökuməti bu sülh tədbirini nifrət, özlərinin çirkin, rəzil niyyətlərinin nümayişi və qəzəb üzərində təşkil etdi. Leonardo da Vinçinin "Sonuncu şam yeməyi" əsərinin parodiyası, din xadimlərinin şəkillərinin draq-şou elementləri ilə birlikdə istifadəsi "uğurlu" təşkilatçılığın ilk nümunəsi oldu. LGBT fərdləri İsa peyğəmbəri və onun həvarilərini əvəz etdilər. Bu da haqlı olaraq, bütün dünyada xristianların etirazına səbəb oldu. Bəlkə də, fransız təşkilatçılar bunun etirazlara səbəb olacağını əvvəldən düşünmüşdülər. Yəqin ki, elə buna görə də açılış üçün idman arenası yox, Sena çayının sahili seçilmişdi. Etirazlar alovlansa, qapalı məkanda ciddi və qarşısıalınmaz nəticələrə gətirib çıxara bilərdi.

Ölkələrinin rəsmi simvolu xoruz olan fransız təşkilatçılar geyləri və "saqqallı qadınları" səhnəyə çıxardı.

Olimpiya oyunlarında "Gey-parad"dan sonra Fransa rəsmilərinin cinsi orientasiyası artıq dünya mətbuatında açıq müzakirə mövzusuna çevrildi.

Siyasəti idmana qarışdıran rəsmi Paris Azərbaycana qarşı açıq təxribatla diqqət çəkdi. Belə ki, oyunların açılış mərasiminin yayımı zamanı Fransanın "Fr2" telekanalının efirində şərhçinin Azərbaycan əleyhinə səsləndirdiyi yersiz və təhqiramiz ifadələr onların illər ərzində içlərində tutduqları kin və nifrətin ifadəsi idi. Azərbaycan idmançılarından ibarət komandanın təqdimatında həmin şərhçi belə deyib: "Ermənistanla ərazi məsələsində toqquşmuş Qafqaz respublikası". Erməni idmançıların keçidi zamanı isə "Ermənistan, bizim erməni dostlarımız! Tarixən fransızların qəlbinə yaxın olan ölkə. Bu gün "Dağlıq Qarabağ"ın süqutundan və Azərbaycan ordusunun hücumundan sonra erməni xalqı üçün əlamətdar gündür" ifadələrini işlədib.

Növbəti rəzillik Cənubi Koreya idmançılarının Şimali Koreya kimi təqdim edilməsidir. Sena çayı boyunca bayraq dalğalandıran komanda həm fransız, həm də ingilis aparıcıları tərəfindən "Koreya Xalq Demokratik Respublikası" kimi təqdim edilib. Cənubi Koreyanın idman nazirliyi bu hadisədən təəssüfləndiklərini və hökumət səviyyəsində Fransaya ciddi şikayət ünvanlayacaqlarını bildirib. Beynəlxalq Olimpiya Komitəsi (IOC) özünün Koreya dilində olan rəsmi "X" hesabında dərhal üzrxahlıq edən yazı paylaşıb.

Bundan başqa, Böyük Britaniyadan olan idmançılar Parisdəki Olimpiya kəndində qida çatışmazlığından və keyfiyyətsiz yeməklərdən narazılıqlarını bildiriblər. Bununla bağlı Britaniya Olimpiya Assosiasiyasının rəhbəri Endi Enson "Daily Mail" nəşrinə bildirib. "İdmançılar Olimpiya kəndindəki əsas restorandan narazıdırlar. İaşə şirkəti yeməklərin çatdırılmasını sürətləndirmək üçün çalışır. Müəyyən qidalar kifayət deyil: yumurta, toyuq, müəyyən karbohidratlar. Bundan əlavə, idmançılara çiy ət verilir. Halbuki, yeməyin keyfiyyəti vacibdir. İdmançılarımız Klişidəki restoranımızda yemək yeməyə üstünlük veriblər", - deyə Enson bildirib.

Bu qədər rüsvayçılığın təkcə açılış mərasimində baş tutmağından, oyunlar bitənə qədər hələ çox şeylərin baş verəcəyini az-çox anlamaq olur. Bir yandan erməni və LGBT sevdası, bir yandan dini duyğuları ilə oynanılmış milyardlarla insan, digər yandan da başdan sona yarıtmaz təşkilatçılıq... Fransaya da elə bu yaraşırdı. Əlbəttə, bu ölkə belə bir beynəlxalq tədbirə ev sahibliyi etmək iqtidarında deyil.