Oktyabrın 31-də Qəbələ Konqres Mərkəzində “Qəbələ qastronomiya sammiti” keçiriləcək. Sammit oktyabr ayı boyunca restoranları, fermerləri və turizm tərəfdaşlarını birləşdirən “Qəbələdə məhsul mövsümü” təşəbbüsünün davamıdır.

Beynəlxalq media nümayəndələrinin diqqətini cəlb edən proqramda “Disciples Escoffier International” təşkilatının Avropa üzrə vitse-prezidenti Lionel Strub əsas məruzəçi qismində iştirak edəcək. Xarici qastronomiya ekspertlərinin və media təmsilçilərinin iştirak edəcəyi sammit Qəbələnin beynəlxalq miqyasda tanıdılması üçün əlavə imkan yaradır. Sammit müddətində forum, eləcə də üç panel iclas təşkil olunacaq.

“Qəbələ kulinariya kolleksiyası” çərçivəsində Qəbələyə məxsus seçilmiş ənənəvi yeməklər hazırlanacaq. Sammitin yekununda “Qəbələ qastronomiya bəyannaməsi”nin imzalanması planlaşdırılır ki, bu da gələcək əməkdaşlıq istiqamətlərini müəyyənləşdirəcək.