Tədbirdə Azərbaycan, Qırğızıstan, Özbəkistan və Şimali Kipr Türk Respublikasının Baş Prokurorluqlarından nümayəndə heyətləri iştirak ediblər. Azərbaycan nümayəndə heyətini Azərbaycan Respublikasının Baş Prokurorluğunu Hüquqi təminat və insan hüquqları məsələləri idarəsinin rəis müavini Günay Əyyubovanın rəhbərliyi ilə Hacıqabul rayon prokuroru Lalə Hüseynova, Hərbi Prokurorluğun Hüquqi təminat və insan hüquqları məsələləri şöbəsinin rəisi Səməd Əliyev, Baş Prokurorluğun Beynəlxalq hüquqi əməkdaşlıq idarəsinin prokuroru Babək Əliyev və Naxçıvan Muxtar Respublikası Prokurorluğunun Daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət şöbəsinin prokuroru Gürsel Novruzlu təmsil ediblər.

  Seminarda sülh və insanlıq əleyhinə, insan alveri cinayətləri ilə mübarizə, həmçinin Beynəlxalq Cinayət Məhkəməsinin fəaliyyəti ilə bağlı çıxışlar dinlənilib, bu sahədə əməkdaşlıq mexanizmlərinin inkişafı üzrə müzakirə aparılıb.

  Tədbirdə Günay Əyyubova “İnsan hüquqları və azadlıqlarının səmərəli təmin edilməsinə müasir yanaşma” mövzusunda çıxış edərək, Azərbaycanda və Azərbaycan Respublikasının Baş Prokurorluğunda insan hüquq və azadlıqlarının müdafiəsi üzrə tətbiq olunan müasir yanaşmalar və görülən mütərəqqi yeniliklər barədə ətraflı məlumat verib. 

  Tədbirin yekununda iştirakçılara Türkiyə Respublikasının Ali Məhkəməsi Baş Prokurorluğunun xüsusi sertifikatları təqdim olunub.