Prezident İlham Əliyevin rəhbərliyi ilə Zəfər zirvəsinə yüksələn, ərazi bütövlüyü və suverenliyini tam təmin edən, dinamik tərəqqi dövrünü yaşayan Azərbaycan, eyni zamanda, mühüm sosial irəliləyişlərə nail olan dövlətdir. Birinci vitse-prezident, Heydər Əliyev Fondunun prezidenti Mehriban Əliyeva Vətənə, xalqa layiqli xidmət məramına əsaslanan əzmkar və çoxşaxəli fəaliyyəti ilə ölkəmizin hərtərəfli inkişafı proseslərində mühüm xidmətlər göstərərək, həmçinin sosial müdafiə sisteminin daim güclənməsinə, əhalinin həssas qruplarının diqqət və qayğı ilə əhatə olunmasına böyük töhfələrini verir.

Elm və təhsilin, mədəniyyətin, səhiyyə və idmanın, milli-mədəni dəyərlərimizin qorunub saxlanması, təbliği və s. sahələrlə yanaşı, davamlı sosial inkişafın təmin edilməsi onun fəaliyyətində daim xüsusi yer tutur və humanizm, ədalət, nəciblik və xeyirxahlıq təcəssümü olan layihə və təşəbbüsləri bu sahədə mühüm rola malikdir.

Birinci vitse-prezident Mehriban Əliyevanın təşəbbüsü ilə son illər uğurla reallaşdırılan DOST Konsepsiyası əsasında sosial sahələrə aid 161 sosial xidmət “bir pəncərə”dən, müasir və çevik, şəffaf, vətəndaş məmnunluğuna uyğun təqdim olunur. 2019-cu ilin may ayından ötən dövrdə artıq 7 DOST Mərkəzi, Zəngilanın Ağalı kəndində “Smart DOST” xidmət məntəqəsi, Qarabağ Regional DOST Mərkəzinin Şuşada filialı açılıb və hazırda digər bölgələrdə də DOST infrastrukturunun qurulması işləri aparılır. Artıq 3,8 milyon vətəndaş DOST xidmətlərindən faydalanıb və bu xidmətlərdən vətəndaş məmnunluğu səviyyəsi 98,6 faiz təşkil edir.

Ölkəmizin yeni brendi kimi tanınan DOST modeli ötən dövrdə 60-dan çox beynəlxalq mükafata, o cümlədən 10-dan çox “Avropa üçün yaxşı təcrübə mükafatı”na layiq görülüb, BMT tərəfindən “İnnovativ ictimai xidmət həlləri” statusunda tanınıb, Aİ Biznes Mühiti Hesabatında Azərbaycanın 3 təkmil islahatından biri kimi qiymətləndirilib.

Həssas qruplara diqqət və qayğı göstərilməsi Birinci vitse-prezident Mehriban Əliyevanın fəaliyyətinin əsas istiqamətlərindən biridir. Onun təşəbbüsü ilə yaradılan və 2021-ci ilin oktyabr ayında açılışı olan DOST İnklüziv İnkişaf və Yaradıcılıq Mərkəzi əlilliyi olan şəxslər, şəhid ailələrinin üzvləri, valideyn himayəsindən məhrum uşaqlar və digər həssas qrupların yaradıcı potensialının inkişafında, ümumən onların cəmiyyətə inteqrasiyasında mühüm rola malikdir. Cənubi Qafqazda ilk və ən böyük inklüziv yaradıcılıq və inkişaf məkanı olan bu Mərkəzdə, onun İsmayıllı və Bərdədəki filiallarında ötən dövrdə 770 nəfər benefisiar xidmətlərlə təmin edilib.

Eyni zamanda, Birinci vitse-prezident Mehriban Əliyevanın təşəbbüsü ilə son illərdə dövlət uşaq müəssisələrinin məzunlarının mənzillə təminatı sahəsində mühüm işlər aparılıb. Heydər Əliyev Fondunun mühüm sosial əhəmiyyət kəsb edən layihələrindən biri olaraq Abşeron rayonunda üç çoxmənzilli yaşayış binası inşa edilərək, həmin məzunların istifadəsinə verilib. Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin “Məzun evi” kimi fəaliyyət göstərən bu yaşayış binalarında 365 məzun mənzillə təmin olunub. Qeyd edilən nəcib tədbirin davamı kimi, dövlət uşaq müəssisələrinin məzunları olan daha yüzlərlə şəxsə yeni inşa olunmuş yaşayış komplekslərindən mənzillər verilib.

Ölkəmizin ərazi bütövlüyünün müdafiəsi uğrunda döyüşlərdə yaralanmış hərbçilərimizin reabilitasiyasına daim dəstək göstərilməsi də Birinci vitse-prezident Mehriban Əliyevanın fəaliyyətində önəmli yer tutur. 2016-cı ilin Aprel döyüşlərində yaralanmış hərbçilərimiz Heydər Əliyev Fondunun layihəsi çərçivəsində qısa zaman ərzində Almaniya, İslandiya, İngiltərənin dünyada müasir protez istehsalçıları kimi tanınan şirkətlərinin yüksək texnologiyalı məhsulları ilə təmin ediliblər. Möhtəşəm Zəfərimizlə yekunlaşan Vətən müharibəsindən sonra dövlət başçısının tapşırığı ilə şəhid ailələri və müharibə iştirakçıları ilə bağlı icra edilən genişmiqyaslı sosial dəstək paketinin bir istiqaməti olaraq da postmüharibə dövründə 494 hərbçimizin 612 yüksək texnologiyalı protezlə təminatı həyata keçirilib.

Eyni zamanda, Birinci vitse-prezident Mehriban Əliyevanın təşəbbüsü və dəstəyi ilə Bakıda Uşaq Reabilitasiya Mərkəzinin, Naxçıvan, Gəncə və Yevlaxda məhdud fiziki imkanlı insanlar üçün regional informasiya mərkəzlərinin, əlilliyi olan uşaqlar üçün sosial xidmət müəssisələrində müasir tələblərə uyğun, nümunəvi yaşayış və reabilitasiya şəraitinin yaradılması təmin edilib.  

Həmçinin həssas qrupların, habelə ahılların yaşadığı sosial xidmət müəssisələrinin sakinləri daim onun diqqət və qayğısı ilə əhatə olunub. Heydər Əliyev Fondu tərəfindən həmin müəssisələrdə tez-tez nəcib tədbirlər təşkil edilir. Pandemiya dövründə isə sosial xidmət müəssisələrindəki sakinlərin, o cümlədən ahılların COVİD-19 infeksiyasından qorunması üçün Fond tərəfindən ardıcıl dəstək işləri aparılıb. Fondun “Regional İnkişaf” İctimai Birliyi isə “Sosial bağlar” layihəsi ilə özünüməşğulluq proqramının genişlənməsinə öz mühüm dəstəyini göstərib və bu layihə çərçivəsində yüzlərlə aztəminatlı ailə üçün intensiv meyvə bağları, tərəvəz və bostançılıq təsərrüfatları qurulub.

Qeyd edilənlər Birinci vitse-prezident, Heydər Əliyev Fondunun prezidenti Mehriban Əliyevanın fəaliyyətində sosial inkişafın təmin edilməsinin mühüm yer tutduğunu, onun əhalinin həssas qruplarının daim dəstəklə əhatə olunmasına, onların reabilitasiya və cəmiyyətə inteqrasiyasına yüksək diqqət və qayğısını özündə əks etdirir.