Abşeron Rayon Polis İdarəsinin Narkotiklərlə Mübarizə Bölməsinin əməkdaşları Xırdalan şəhərində, Novxanı, Məhəmmədli və Hökməli qəsəbələrində əməliyyatlar keçiriblər.

Daxili İşlər Nazirliyinin mətbuat xidmətindən AZƏRTAC-a verilən məlumata görə, əməliyyat zamanı narkotiklərin qanunsuz dövriyyəsində şübhəli bilinən Əli Babayev, Nərgiz Həsənova, Nadir Məmmədov və Səbir Məmmədov saxlanılıblar.

Onlardan, idarə etdikləri avtomobillərdən və yaşadıqları evlərdən, ümumilikdə, 15 kiloqram, o cümlədən 9 kiloqram marixuana, 4 kiloqram heroin, 2 kiloqram psixotrop maddə metamfetamin və 50 satışı qadağan edilən metadon həbi aşkar olunub. Saxlanılan şəxslər ölkəyə İrandan qaçaqmalçılıq yolu ilə gətirilən narkotik vasitələri Bakı şəhəri və Abşeron rayonunda ayrı-ayrı şəxslərə çatdıraraq pul qazanmaq məqsədi ilə əldə etdiklərini bildiriblər.

Faktla əlaqədar cinayət işləri başlanılıb, əməliyyat-istintaq tədbirləri davam etdirilir.