Azərbaycan Respublikasının Baş Prokurorluğunun Kriminalistika və informasiya texnologiyaları idarəsinin prokuroru Ənvər Nəbiyev Qarabağ Universitetində hüquqşünaslıq ixtisası üzrə təhsil alan tələbələrlə görüş keçirib.

Görüş çərçivəsində Ənvər Nəbiyev “Kriminalistikaya giriş” mövzusunda mühazirə ilə çıxış edərək tələbələrə kriminalistikanın əsas anlayışları, müasir texnologiyaların cinayətlərin açılmasında rolu, sübutların toplanması və təhlili üsulları, eləcə də hüquq-mühafizə orqanlarında tətbiq edilən qabaqcıl metodlar barədə ətraflı məlumat verib.

Mühazirə zamanı tələbələr tərəfindən verilən suallar cavablandırılıb, cinayət işlərinin istintaqında qarşıya çıxan aktual məsələlər müzakirə olunub.

Qeyd edək ki, tədbirin keçirilməsində məqsəd tələbə hüquqşünasların kriminalistika sahəsində nəzəri biliklərini artırmaq və onları praktiki təcrübə ilə tanış etməkdir.