Lider-media.az  Energetika Nazirliyinə istinadən xəbər verir ki, bu barədə Cənub Qaz Dəhlizi Məşvərət Şurası nazirlərin 11-ci iclası və Yaşıl Enerji Məşvərət Şurası nazirlərin 3-cü iclası çərçivəsində energetika naziri Pərviz Şahbazovla ABŞ Dövlət Departamentinin Enerji Ehtiyatları Bürosunun baş məsləhətçisi Erik Ceykobs arasında keçirilən görüşdə bildirilib.

Görüşdə Azərbaycan-ABŞ enerji tərəfdaşlığının Bakı-Tbilisi-Ceyhan və Cənub Qaz Dəhlizi kimi regional və beynəlxalq əhəmiyyətli enerji təhlükəsizliyi layihələrinin həyata keçirilməsinə verdiyi töhfələrdən bəhs edilib. Bu əməkdaşlığın enerji sahəsində müasir reallıqlar və Azərbaycanın enerji təchizatını təbii qaz və bərpa olunan enerji layihələri ilə şaxələndirməsi müstəvisində inkişaf perspektivləri dəyərləndirilib.

Avropaya son illərdə qaz tədarükündə əhəmiyyətli artımın olduğu, bununla belə əlavə həcmlərə olan tələbat və dayanıqlı enerji təhlükəsizliyinin təbii qaz sahəsinə, o cümlədən infrastruktura investisiyaları zəruri etdiyi bildirilib. Yeni reallıqlara uyğun yeni yanaşmalara ehtiyac olduğu qeyd edilib.

Görüşdə, həmçinin elektrik enerjisi və interkonnektorların artan roluna da toxunulub və bu xüsusda, Azərbaycanın zəngin “yaşıl enerji” resursları, təşəbbüskarı və iştirakçısı olduğu müxtəlif enerji dəhlizləri layihələri barədə məlumat verilib. Bu dəhlizlərin Azərbaycan, Mərkəzi Asiya, Türkiyə və Avropa arasında enerji əlaqələrini təmin etməklə enerji təhlükəsizliyi və ölkələrin rifahına gətirəcəyi faydalardan bəhs edilib.

Söhbət zamanı bir sıra regional və ikitərəfli əməkdaşlıq məsələləri ilə bağlı da fikir mübadiləsi aparılıb.