Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Həssas əhali qruplarından olan şəxslər üçün Sığınacaq və Sosial Reabilitasiya Müəssisəsinə mediatur təşkil edilib.Jurnalistlər müəssisədə göstərilən xidmətlərlə əyani tanış olublar. Media nümayəndələrinə müəssisədə həssas qruplardan olan şəxslərlə aparılan reabilitasiya işləri, burada fəaliyyət göstərən şöbələrin iş prinsipləri, göstərilən xidmətlərin formaları, müəssisəyə qəbul qaydaları barədə məlumat verilib. Bildirilib ki, Həssas əhali qruplarından olan şəxslər üçün Sığınacaq və Sosial Reabilitasiya Müəssisəsində baxımsız, kimsəsiz və sosial təhlükəli vəziyyətdə olan yetkinlik yaşına çatmayanların, müəyyən yaşayış yeri olmayan 18 yaşından yuxarı şəxslərin, görmə qabiliyyəti məhdud şəxslərin və b. sosial reabilitasiyası işləri aparılır.

Müəssisəyə qəbul olunanlar burada sosial-məişət, sosial-hüquqi xidmətlərlə yanaşı, günlük olaraq qida normaları əsasında yemək, qəlyanaltı, yaşayış yeri və geyimlə təmin edilirlər. 

Müəssisəyə qəbul şəxsin özünün və ya qanuni nümayəndəsinin müraciəti, həmçinin daxili işlər, yerli icra hakimiyyəti orqanlarının və bələdiyyələrin göndərişləri əsasında Agentliyin yerli qurumları və ya “DOST” mərkəzləri vasitəsilə aparılır.Qeyd edək ki, müəssisədə ötən il daha 215 nəfərə xidmət göstərilib.