Bunu Səhiyyə Nazirliyinin rəsmi İnstaqram hesabında canlı yayımda nazirliyin mütəxəssis-eksperti, infeksionist Təyyar Eyvazov açıqlayıb.“Əhalinin sağlamlığının qorunması və kəskin respirator virus infeksiyalarına yoluxma hallarının qarşısının alınması məqsədilə Azərbaycan Respublikasının Səhiyyə Nazirliyi risk qrupuna aid olan vətəndaşları mövsümi qripə qarşı peyvənd olunmağa çağırır”, - deyə o bildirib.

Təyyar Eyvazov deyib ki, qripə qarşı peyvənd olunmaq istəyən şəxslər yaşayış və ya iş yeri üzrə əhaliyə ambulator-poliklinik xidmət göstərən dövlət tibb müəssisələrinə müraciət edə bilərlər: “Qeyd etmək istərdim ki, bu peyvənd həmçinin kiçik yaşlı uşaqlara, hamilə qadınlara, yaşlı insanlara vurula bilər. Vaxtında peyvənd almış şəxs qripə yoluxduqda xəstəliyi sipmtomsuz, bəzən yüngül keçirir. Nəticədə ağır gedişə çox az rast gəlinər, fəsadlaşma demək olar ki, baş vermir”.

Mütəxəssis-ekspert bildirib ki, xəstə uşağın məktəb, bağçaya buraxılması doğru qərar deyil:

“Xüsusən də qapalı məkanlarda maskadan istifadə olunsun, həmçinin, əl və respirator gigiyena qaydalarına ciddi riayət olunmalıdır. Yadda saxlamaq lazımdır ki, özümüzdə olan xroniki xəstəlikləri vaxtında müalicə etdirmək, sağlam həyat tərzi keçirmək, düzgün qidalanmaq, yəni qida ilə kifayət qədər vitamin və minerallar almaq, streslərdən mümkün qədər yayınmaqla immun sistemini kifayət qədər aktiv vəziyyətdə saxlamaq mümkündür . Bu halda hətta xəstələnsək belə, daha tez sağalar və xəstəliyin fəsadlarından özümüzü qoruya bilərik”.