Dekabrın 29-da Azərbaycan Həmkarlar İttifaqları Konfederasiyasının üzvü Naxçıvan Həmkarlar İttifaqları Şurasında 31 Dekabr - Dünya Azərbaycanlılarının Həmrəyliyi Günü və Yeni il münasibətilə qazilərlə görüş keçirilib.Əvvəlcə Ulu Öndər Heydər Əliyevin, Azərbaycanın müstəqilliyi və ərazi bütövlüyü uğrunda canını fəda edən şəhidlərimizin və təyyarə qəzasında həlak olanların əziz xatirəsi bir dəqiqəlik sükutla yad edilib.Tədbirdə Şuranın sədri Qəzənfər Abdullayev bildirib ki, dövlətimiz tərəfindən şəhid ailələrinə, qazilər və müharibə iştirakçılarına yüksək diqqət göstərilir. Onun sözlərinə görə, Azərbaycan həmkarlar ittifaqları da həmin kateqoriyadan olan insanlara qayğı ilə yanaşır, öz dəstəyini əsirgəmir.

Sonra “Naxçıvan Qaziləri” İctimai Birliyinin sədri Ceyhun Bayramov qazilərin Vətən müharibəsində göstərdiyi fədakarlıqdan söz açıb, bu cür görüşlərin keçirilməsini mənəvi dəstək adlandırıb.Görüşdə Naxçıvan Ali Məclisinin deputatı, Vətən müharibəsi qazisi Təbriz Zeynalov, “Naxçıvan Qaziləri” İctimai Birliyinin sədr müavini Əli Əlisoy, Sədərək döyüşlərinin iştirakçısı Nəzifə Qaybalıyeva və qazi Rza Əlirzayevin çıxışları da dinlənilib.

Qeyd edək ki, AHİK-in dəstəyi ilə Naxçıvan Həmkarlar İttifaqları Şurası tərəfindən qazilərə Həmrəylik Günü və Yeni il ərəfəsində bayram hədiyyələri verilib.