Torpaq, Vətən uğrunda gedən döyüşlərdə  şəhidlik zirvəsinə ucalanları bu gün xatırlamaq  mənəvi borcumuzdur. Bu müharibə Azərbaycana zəfər sevincini bəxş etməklə yanaşı, xalqımızın qəhrəman oğullarını da bir daha  tanıtdı. Şəhidlik əbədiyyət zirvəsidir. Ən ali, müqəddəs və şərəfli zirvə olan şəhidlik məqamına yüksələnlər daim qəlblərdə yaşayırlar. Uca Yaradanın, Vətənin, millətin yolunda şüurlu surətdə canlarını fəda edənlər hər zaman hörmətlə anılırlar.

Torpaqlarımızın azadlığı, vətənimizin bütövlüyü uğrunda gözünü qırpmadan canını fəda edən şəhidlərimizin xatirəsini əziz tutmaq hər birimizin borcudur. Azərbaycan gəncinin millətinə, dövlətinə və torpağına bağlılığının bariz nümunəsi, vətənpərvərliyi ilə gələcək nəsillərə örnək olan şücaətli oğullardan biri də şəhid Yusif Cəfərovdur. Vətən müharibəsi şəhidi Yusif Mübariz oğlu Cəfərov 1996-cı ilin aprelin 22-də Şirvan şəhərində anadan olub. Atası Mübariz Birinci Qarabağ müharibəsində döyüşərək 1992-ci ildə yaralanmış, uzun müddət müalicələr alsa da Yusifin 3 yaşında ikən dünyasını dəyişib.

Yusif Gülbəniz xanımın gözünün ağı-qarası yeganə övladı idi. Gülbəniz xanım bütün arzularını, ümidlərini, xəyallarını, hər şeyini Yusifə bağlamışdı. Yusif də kiçiik yaşlarından ağlı, tərbiyyəsi, davranışları ilə anasının tənha həyatına nur saçırdı. 2002-ci ildə Şirvan şəhər 2 nömrəli tam orta məktəbin 1-ci sinfinə daxil olan Yusif ilk gündən dərslərinə məsuliyyətlə yanaşır, hər zaman hazırlıqlı olmağa çalışırdı. Orta məktəb illərində müəllimlərinin və sinif yoldaşlarının hörməti qazanmışdı. Yusifin yaradıcılıq istedadı var idi. Gözəl şeirlər yazaır, rəsmlər çəkirdi. Hətta atasının adını özünə təxəllüs də seçmişdi-Yusif Mübariz. İntizamı, prinsipiallığı, zəhməti tezliklə ona tələbə adını qazandırır. 2013-cü ildə orta məktəbi bitirdikdən sonra Mingəçevir Dövlət Universitetinin İqtisadiyyat fakültəsinə daxil olur və 2017-ci ildə ali təhsilini başa vurur.

2018-ci ildə  Səfərbərlik və Hərbi Xidmətə Çağırış üzrə Dövlət Xidmətinin Şirvan şəhər şöbəsi tərəfindən Azərbaycan Silahlı Qüvvələrinə həqiqi hərbi xidmətə çağırılır və 1 il əsgər kimi Vətənə xidməti borcunu ləyaqətlə yerinə yetirir. Ölkə Prezidentinin “Azərbaycan Respublikasında qismən səfərbərlik elan edilməsi haqqında” 28 sentyabr 2020-ci il tarixli Sərəncamına əsasən SHXÇDX-nin  Şirvan şəhər şöbəsinin çağırışı ilə sentyabrın 30-da cəbhəyə yollanır. Füzuli, Cəbrayıl, Zəngilan və Qubadlının işğaldan azad olunması uğrunda döyüşlərdə əsl qəhrəmanlıq nümunələri göstərir. Xocavənd döyüşlərində qəhrəmancasına şəhid olan Yusif Cəfərov 2020-ci ilin noyabrın 4-də Şirvan şəhər Şəhidlər xiyabanında izdihamla torpağa tapşırılır. Uğrunda can verdiyi torpaq igid oğlunu öz ağuşuna alır.  Yusif hərbi hissə rəhbərliyinin və döyüş yoldaşlarının xatirəsində mətin, mübariz, cəsarətli əsgər kimi qalıb. Döyüş tapşırıqlarını şərəflə yerinə yetirdiyinə görə Yusifin xidmətləri dövlət başçısı tərəfindən yüksək qiymətləndirilib. 

Prezident İlham Əliyevin 15 dekabr 2020-ci il tarixli Sərəncamına əsasən "Vətən uğrunda ,"Cəbrayılın azad olunmasına görə”,   “Qubadlının azad olunmasına görə” medalları ilə təltif edilib.

Şəhidin anası Gülbəniz xanım Yusifin vətənpərvərlik ruhunda tərbiyə olunduğundan, hərbi xidmət zamanı göstərdiyi qəhrəmanlığından fəxrlə söz açır. Bildirir ki, Yusif öz ailə üzvlərinə, yaxınlarına qarşı çox həssas olub. Cəbrayıl, Qubadlı rayonlarının ərazisində gedən döyüşlərdə qəhrəmanlıq göstərib. Oğlum gələcək nəsillərə örnəkdir. Yaralı döyüş yoldaşlarının həyatını xilas edib. Qürür duyuram ki,şəhid anasıyam. Yusif tək mənim yox bütün Azərbaycanın oğludur.

Ömrünü Vətən yolunda qurban verən Yusif qələbəni görməsə də, adını heç zaman unudulmayacaq qəhrəmanlar salnaməsinə yazdırdı. Nə qədər ki canını Vətən uğrunda əsirgəməyən igidlərimiz var Azərbaycan daima yaşayacaq, ucalacaq və qalib gələcək!