Noyabrın 1-də Dövlət Sərhəd Xidmətinin (DSX) Sərhəd Nəzarəti Komandanlığına media nümayəndələrinin və hərbi ekspertlərin iştirakı ilə mediatur təşkil olunub. Mediatur zamanı Dövlət Sərhəd Xidməti nəzdində olan beş əsas komandanlığın fəaliyyəti, tarixi və gördüyü işlər haqqında geniş məlumat jurnalistlərə təqdim olunub. Tədbirdə çıxış edən Dövlət Sərhəd Xidməti Sərhəd Nəzarətinin rəisi general-leytenant Elşən Verdiyev komandanlığın tarixi və gördüyü işlər barədə məlumatları jurnalistlərlə bölüşüb. Qeyd olunub ki, dövlət sərhədindən hərəkət edən şəxslərin, nəqliyyat vasitələrinin və yüklərin artmasını nəzərə alaraq, etibarlı sərhəd nəzarətinin təmin edilməsi məqsədilə cənab Ali Baş Komandanın 5 iyun 2017-ci il tarixli müvafiq Fərmanı ilə Dövlət Sərhəd Xidmətinin Sərhəd Nəzarəti Komandanlığı yaradılmışdır.

General-leytenant Elşən Verdiyev bildirib ki, Sərhəd Nəzarətinin Komandanlığı fəaliyyətə başladığı 2017-ci ildən indiyədək axtarışda olan 26 865 nəfər saxlanılaraq aidiyyəti dövlət orqanlarına təhvil verilmiş, ümumilikdə 86123 əməliyyat tapşırığı yerinə yetirilmişdir. 2296 halda saxta və 178 halda özgəsinə məxsus sənədlərlə keçməyə və 19 halda gizli şəkildə dövlət sərhədini pozmağa cəhd edərkən saxlanılmışdır. Dövlət sərhədindən keçməyə hüquq verən sənədləri olmayan 58503 nəfər barəsində müvafiq qərarlar qəbul edilmişdir. Müxtəlif səbəblərdən arzuolunmaz şəxs qismində 2106 əcnəbi ölkə ərazisinə buraxılmamışdır. Eyni zamanda qarşılıqlı əlaqədə olaraq qaçaqmal və narkotik vasitələrin qeyri-qanuni dövriyyəsi ilə mübarizə çərçivəsində həyata keçirilmiş tədbirlər nəticəsində 3599 halda aşkar edilərək götürülmüş qaçaqmalın ümumi təxmini dəyəri 442 milyon 227 min 857 manat təşkil etmiş, narkotik vasitələrin qeyri-qanuni dövriyyəsinə qarşı mübarizə çərçivəsində 1028 halda ümumi çəkisi 7 ton 422 kq 400 qram narkotik vasitə və 86 min 246 ədəd psixotrop həb aşkar edilərək qeyri-qanuni dövriyyədən çıxarılmışdır. Elşən Verdiyev Dövlət Sərhəd Xidmətinin Sərhəd Nəzarətinin BMT-nin İqlim Dəyişmələri üzrə Çərçivə Konvensiyasının Tərəflər Konfransının ölkəmizdə keçiriləcək 29-cu sessiyası - COP29 beynəlxalq konfransına hazırlıqla əlaqədar gələn xarici qonaqların pasport nəzarətindən sürətli keçidinin təmin edilməsi üçün xüsusi texniki təchizatla və nəzarət avadanlıqları ilə təmin olunduğunu, zəruri tədbirlərin görüldüyünü, eləcə də bütün tapşırıqların tam olaraq icra edildiyini diqqətə çatdırıb. DSX-nin Sərhəd Nəzarətinin bu ay Azərbaycanda keçiriləcək COP29 tədbirinə hazırlığından danışıb: "COP29-la bağlı texniki, təchizat məsələləri artıq yekunlaşıb. Qoyulan tapşırıqları yerinə yetirməyə tam hazırıq. Bununla bağlı Dövlət Sərhəd Xidmətinin rəisi general-polkovnik Elçin Quliyev də öz tapşırıqlarını verib. Buraxılış məntəqələrindən daxil olan şəxslərə, nəqliyyat vasitələrinə etibarlı nəzarət təmin olunur".

Rəisin çıxışından sonra Dövlət Sərhəd Xidmətinin tarixi, gördüyü işlər və əldə etdiyi nailiyyətləri özündə əks etdirən videoçarx təqdim olunub. Mediatur çərçivəsində media nümayəndələri və hərbi ekspertlər Sərhəd Nəzarəti Komandanlığının sənədlərdə saxtakarlığın aşkar edilməsi üçün səyyar təlim qurğusu, səyyar radiasiya aşkarlama avadanlığı, Sərhəd Nəzarətinin videomüşahidə və "qaynar xətt" mərkəzi, Sərhəd Nəzarətinin nəzdində kurslara cəlb olunmuş heyət üçün tədris sinifləri, xidməti və istirahət otaqları, konfrans və idman zalları, yeməkxana, Sərhəd Nəzarətinin Heydər Əliyev Beynəlxalq Aeroportundakı əməkdaşlarının iş fəaliyyəti ilə tanış olublar.

Mediatur zamanı DSX-nin Sərhəd Nəzarətində narkotik və partlayıcı maddələrin aşkarlanması məqsədilə xüsusi hazırlanmış xidməti itlər barədə də məlumat verilib. Komandanlığın kapitanı Hüseyn Qənbərli dövlət sərhədində təhlükəsizlik tədbirlərinin gücləndirilməsi üçün bu itlərin vacib rol oynadığını vurğulayıb. Bu xüsusi təlim keçmiş itlər sərhəd nöqtələrində qaçaqmalçılığın qarşısının alınmasında əhəmiyyətli işlər görür. Hərbçi tərəfindən "Çaki" adlı it vasitəsilə narkotik maddələrin axtarılması prosesi əyani şəkildə göstərilib.

Mediatur zamanı Heydər Əliyev Beynəlxalq Hava Limanında fəaliyyət göstərən DSX-nin Sərhəd Nəzarəti Komandanlığının təlim və xidmət imkanları haqqında ətraflı məlumat verilib. Bu çərçivədə hava limanında yerləşən sinif otaqları və idman zalı diqqətə çatdırılıb. Bu zallar əməkdaşların fiziki və peşə hazırlığını artırmaq üçün vacibdir. Bildirilib ki, Sərhəd Xidməti əməkdaşları yerli və beynəlxalq idman yarışlarında uğurla iştirak edərək müxtəlif medallar qazanıblar ki, bu da onların fiziki hazırlığa verdiyi önəmi göstərir.

Media nümayəndələri həmçinin Sərhəd Nəzarətinin hava limanında sərhəd keçid məntəqələrindəki gündəlik iş prosesi ilə tanış olublar. Ölkəyə gələn və gedən şəxslərin qeydiyyat və pasport yoxlama prosesləri canlı olaraq izlənilib, bununla da sərhəd təhlükəsizliyinin təmini üçün aparılan işlərə dair praktiki məlumat əldə edilib. Sərhəd Nəzarətinin mayoru Nicat Cahidzadə qeyd edib ki, yaxınlaşan COP29 tədbiri ilə əlaqədar hava limanında çalışan sərhəd əməkdaşlarının sayı artırılıb. COP29 zamanı hər hansı fövqəladə halların qarşısını almaq məqsədilə təhlükəsizlik sistemlərinin dayanıqlılığı təmin olunacaq və müvafiq tədbirlər həyata keçiriləcək. Bu hazırlıqlar tədbirin təhlükəsizliyi və fasiləsiz sərhəd nəzarətinin təmin olunması məqsədilə önəmli bir addım kimi vurğulanıb.

Lider-media.az