Son illərdə ölkədə su ehtiyatlarından səmərəli istifadənin və su təsərrüfatı obyektlərinin idarə olunmasının təkmilləşdirilməsi, müasir tələblərə cavab verən meliorasiya və su təsərrüfatı obyektlərinin qurulması, eləcə də bu sahədə uçot və nəzarətin təkmilləşdirilməsi istiqamətində ardıcıl tədbirlər görülür. 

Bununla yanaşı, son dövrlərdə müşahidə edilən qlobal iqlim dəyişikliyi, dünyada orta temperaturun yüksəlməsi, əsasən qonşu ölkələrdən daxil olan yerüstü su ehtiyatının azalması, həmçinin suya olan tələbat məhdud su ehtiyatlarına malik olan ölkəmizdə ehtiyatların artırılması və sudan səmərəli istifadə üçün təxirəsalınmaz tədbirlər görülməsini zəruri edib. 

Bu məqsədlə Prezident İlham Əliyevin tapşırığına əsasən ölkəmizdə su ehtiyatlarından səmərəli istifadənin təmin edilməsi ilə bağlı Dövlət Su Komissiyası yaradılıb. Baş nazirin müavini Şahin Mustafayevin rəhbərlik etdiyi Dövlət Su Komissiyası tərəfindən ölkə ərazisində tədbirlər planına uyğun bir sıra işlər uğurla həyata keçirilir və davam etdirilir. 

Plana uyğun həyata keçirilən layihələrdən biri də “Türyançay sol sahil kanalının yenidən qurulması”nın I mərhələsidir. Azərbaycan Dövlət Su Ehtiyatları Agentliyi tərəfindən kanalın bərpasına 2023-cü ildə başlanılıb və bu ilin sonuna qədər yekunlaşması nəzərdə tutulub.  
Ümumi uzunluğu 11,5 kilometr olan suvarma kanalı üzərində sudü¬şürən, suburaxan, borulu keçid, səviyyəqaldıran, akveduk olmaqla ümumilikdə 48 hidrotexniki qurğu var. 

Mənbəyini Türyançay çayından götürən suvarma kanalının yenidən qurulması nəticəsində Ağdaş və Ucar rayonlarının 11.335 hektar torpaq sahəsinin suvarılması yaxşılaşdırılacaq. Bu isə həmin torpaqlarda məhsuldarlığı artırmaqla yanaşı, təkrar əkin aparılmasına da  imkan yaradacaq. 

Hazırda 11,5 kilometr uzunluğu olan kanalın qurğularla birgə 7 kilometrlik hissəsinin tikintisi tamamlanıb və işlər davam edir.