Bu günə qədər məhz bununla bağlı qanunvericilikdə boşluq olduğu üçün mübarizə aparmaq mümkün deyildi. Hansı maddəni tətbiq etməyə gəldikdə isə bununla bağlı da xüsusi bir mexanizm yox idi. Bildiyim qədərilə "parkovşiklərlə" bağlı mübarizə tədbirləri həyata keçirilərkən saxlanıldıqda onlara qanunsuz küçə ticarəti ilə məşğul olmağa görə 80 manat cərimə tətbiq edilirdi. Lakin bu da effektiv olmadı. Nəticədə hüquqi müstəvidə daha sərt sanksiyaların tətbiqinə ehtiyac yarandı. Qanunvericilikdə bu maddənin əks olunması artıq hüquqi bazanın formalaşdığını göstərir. Bu da o deməkdir ki, həmin şəxsləri ciddi cəzalar gözləyir.

Digər tərəfdən isə parklanma yerini ödəniş etmədən tərk etməyə görə nəzərdə tutulan cərimələr də artıb. Fikrimcə, bu gün buna o qədər də ehtiyac yox idi. Ödəniş etmədən ərazini tərk etmək, müddəti ötürmək və bu kimi əməllərin əksəriyyəti məqsədli şəkildə edilmir. Bəzən unutqanlıq, bəzən texnologiyadan düzgün istifadə edə bilməmə belə hallara gətirib çıxarır. Nəzərə almalıyıq ki, parklanmanın qiyməti, saatı bir manatdır. Vətəndaş da bir manatı ödəməyi daha üstün tutar, nəinki iyirmi manat cəriməni. Sadəcə bunun üçün prosedurlar doğru şəkildə qurulmalıdır ki, vətəndaş da buna uyğun işini görə bilsin.

Lakin Qanunun digər bir maddəsində parklanmanı düzgün həyata keçirə bilməyən insanlarla bağlı müddəa da yer alıb. Adətən bir avtomobili iki avtomobilin yerində park edirlər və yaxud da maşını düzgün olmayan formada saxlayırlar. Belə olduğu təqdirdə də digərlərinin yolunu kəsmiş olurlar. Qanun bu cür şəxslərlə mübarizədə də işə yarayacaq. Hər bir halda düşünürəm ki, bütün problemlər zamanla öz həllini tapacaq.