Azərbaycan Həmkarlar İttifaqları Konfederasiyası, Azərbaycan Milli Elmlər Akademiyası (AMEA), Azərbaycan Yazıçılar Birliyi və AMEA Azad Həmkarlar İttifaqının birgə təşkilatçılığı ilə Xalq şairi, görkəmli dramaturq, ədəbiyyatşünas, ictimai xadim, akademik Səməd Vurğunun anadan olmasının 120 illiyinə həsr edilmiş “Elm, ədəbiyyat və sosial həyat” (Fizika və lirika - IX) adlı tədbir keçirilib.

Əvvəlcə AMEA əməkdaşlarının rəsm əsərlərindən ibarət sərgiyə baxış olub.

Tədbir Azərbaycan Respublikasının Dövlət Himninin səsləndirilməsi ilə başlayıb, Azərbaycan xalqının Ümummilli Lideri Heydər Əliyevin və torpaqlarımızın azadlığı uğrunda canlarından keçmiş şəhidlərimizin xatirəsi bir dəqiqəlik sükutla yad edilib.

Tədbirdə çıxış edən Azərbaycan Həmkarlar İttifaqları Konfederasiyasının sədr müavini Musa Mirzəyev Ümummilli Lider Heydər Əliyevin elm, ədəbiyyat və mədəniyyət xadimlərinə göstərdiyi diqqət və qayğıdan söz açıb, bu siyasətin cənab Prezident İlham Əliyev tərəfindən uğurla davam etdirildiyini vurğulayıb. O, Birinci vitse-prezident hörmətli Mehriban xanım Əliyevanın milli-mədəni irsin qorunması, Azərbaycan ədəbiyyatının və mədəniyyətinin beynəlxalq aləmdə tanıdılması istiqamətində həyata keçirdiyi layihələrin əhəmiyyətini qeyd edib.

Musa Mirzəyev Xalq şairi Səməd Vurğunun Azərbaycan ədəbiyyatının ən görkəmli simalarından biri olduğunu deyib, şairin zəngin yaradıcılığının vətənpərvərlik ruhunun aşılanmasında və ədəbi fikrin inkişafında müstəsna rol oynadığını bildirib.

Azərbaycan Yazıçılar Birliyinin sədri, Xalq yazıçısı Anar “Səməd Vurğunun yaradıcılığında və fəaliyyətində sosial mədəni həyat” mövzusunda çıxış edərək şairin Azərbaycan poeziyasının, milli ədəbi fikrin inkişafındakı xidmətlərindən söz açıb, onun zəngin yaradıcılığına nəzər salıb.

AMEA-nın prezidenti, akademik İsa Həbibbəyli Səməd Vurğun irsinin öyrənilməsi və təbliğinin vacibliyini bildirib, bu kimi tədbirlərin keçirilməsini yüksək qiymətləndirərək Azərbaycan Həmkarlar İttifaqları Konfederasiyasının rəhbərliyinə yaratdığı şəraitə və təşkilati dəstəyə görə təşəkkürünü ifadə edib.

Azərbaycan Mətbuat Şurasının sədri, AYB-nin sədr müavini Rəşad Məcid, Türkiyənin Erzincan Binəli Yıldırım Universitetinin professoru Ali Kafkasyalı və Pakistanın Lahor Dövlət Kollec Universitetinin dosenti Almas Xanım çıxış edərək Səməd Vurğunun yaradıcılığının Azərbaycanın hüdudlarından kənarda, bütün Türk və Şərq ədəbi-mədəni məkanında mühüm yer tutduğunu vurğulayıblar.

Tədbir çərçivəsində AMEA-nın Mərkəzi Elmi Kitabxanası tərəfindən Xalq şairi Səməd Vurğunun 120 illiyi münasibətilə hazırlanmış rəqəmsal məlumat bazasının təqdimatı keçirilib.