Yay tətili hər kəs üçün səbirsizliklə gözlənilən dövrdür. Səyahət planlaşdırarkən isə turistlərin diqqət yetirdiyi əsas məqamlardan biri təyinat məntəqəsinə mümkün qədər tez və rahat çatmaqdır. Xüsusilə yay mövsümündə bir çox beynəlxalq hava limanlarında yaranan uzun növbələr və sərhəd prosedurları səyahət vaxtını uzadır.

Dünya Səyahət və Turizm Şurasının (WTTC) sifarişi ilə aparılan araşdırmaya görə, Avropa İttifaqında tətbiq ediləcək yeni Giriş/Çıxış Sistemi (EES) və biometrik sərhəd yoxlamaları səbəbindən sərhəddə yaranan 3–4 saatlıq gözləmə müddəti səyahətçilərin təxminən üçdə birinin Şengen ölkələrinə səfər planlarını dəyişməsinə səbəb ola bilər.

Belə bir şəraitdə Türkiyə rahat giriş prosedurları, geniş birbaşa uçuş şəbəkəsi və inkişaf etmiş nəqliyyat infrastrukturu ilə yay tətili üçün ən əlverişli istiqamətlərdən biri kimi seçilir. Buraya gələn turistlər vaxtlarını hava limanlarında deyil, istirahətdə keçirmək imkanı qazanırlar.

Birbaşa uçuşlar və sürətli giriş

Türkiyənin üstünlüklərindən biri ölkənin yeddi coğrafi bölgəsini əhatə edən müasir hava limanları şəbəkəsidir. Yüksək xidmət standartları, müasir infrastruktur və türk qonaqpərvərliyi sayəsində qonaqlar ölkəyə ilk addımdan rahatlıq hiss edirlər.

İstanbulun iki beynəlxalq hava limanı ilə yanaşı, İzmir, Antalya, Muğla və Ankara kimi məşhur turizm mərkəzlərinə də dünyanın müxtəlif şəhərlərindən birbaşa uçuşlar həyata keçirilir. Hətta Kapadokyaya belə yaxınlıqdakı hava limanları vasitəsilə asanlıqla çatmaq mümkündür.

Geniş aviareys şəbəkəsi Türkiyəni regionun ən əlçatan turizm istiqamətlərindən birinə çevirib. Xüsusilə İstanbul və Antalya hava limanları dünyanın aparıcı aviasiya mərkəzləri ilə çoxsaylı birbaşa uçuşlar həyata keçirərək səyahəti daha rahat edir.

Bu üstünlüyün ən parlaq nümunəsi İstanbul Hava Limanıdır. Hava limanı mayın 31-də bir gün ərzində 1730 reysə xidmət göstərərək fəaliyyətə başladığı gündən bəri ən yüksək gündəlik göstəricisini qeydə alıb. Müasir terminal infrastrukturu və səmərəli idarəetmə sistemi sərnişin axınının operativ təşkilinə, qonaqların isə vaxt itirmədən tətilə başlamasına şərait yaradır.

Rahat nəqliyyat və uzun yay mövsümü

Türkiyənin digər beynəlxalq hava limanları da Avropanın əsas şəhərləri ilə geniş aviareys əlaqələrinə malikdir. Yay mövsümündə xüsusilə İzmir, Muğla və Antalya istiqamətlərinə birbaşa uçuşların sayı əhəmiyyətli dərəcədə artır. Orta hesabla 3–4 saat davam edən uçuş müddəti hətta qısa həftəsonu istirahətini də rahat planlaşdırmağa imkan verir.

Aralıq dənizi iqlimi sayəsində Türkiyədə yay mövsümü sentyabr, hətta oktyabr ayına qədər davam edir. Bu isə turistlərə Mavi Bayraqlı çimərliklərdə dincəlmək, kristal təmiz dənizdə üzmək və dalğıclıq kimi müxtəlif su idman növləri ilə məşğul olmaq üçün daha geniş imkan yaradır.

Şəhər mərkəzlərinə çatmaq da olduqca rahatdır. Hava limanlarından metro, bələdiyyə avtobusları, taksi və xüsusi transfer xidmətləri vasitəsilə əsas turizm məkanlarına qısa vaxtda getmək mümkündür.

Antalyanın günəşli sahilləri, İstanbulun zəngin tarixi və mədəni irsi, Kapadokyanın bənzərsiz təbiəti və Egey sahillərinin ecazkar mənzərələri Türkiyəni yay mövsümündə hər zövqə uyğun istirahət məkanına çevirir. Rahat uçuş imkanları və sürətli giriş prosedurları isə tətilə ilk andan komfortla başlamağa şərait yaradır.