Azərbaycan Həmkarlar İttifaqları Konfederasiyası tərəfindən həmkarlar ittifaqları üzvlərinin övladları üçün təşkil olunan “Yay macərası” uşaq düşərgəsi davam edir. İyulun 6-dan başlayan düşərgədə ilk üç həftə ərzində 311 uşaq istirahət imkanı qazanıb. Düşərgə müddətində uşaqların fiziki və intellektual inkişafını hədəfləyən zəngin proqram həyata keçirilir. Proqram çərçivəsində uşaqlar müxtəlif idman yarışlarında, intellektual oyunlarda, əyləncəli komanda oyunlarında, maarifləndirici görüşlərdə və digər maraqlı tədbirlərdə iştirak edirlər.

Düşərgə proqramı müxtəlif yaş qrupları üçün uyğunlaşdırılaraq tərtib olunub və peşəkar mentorların rəhbərliyi ilə keçirilən oyunlar, təlimlər və görüşlər uşaqların sağlam və mənalı istirahətinin təşkilinə, bilik və bacarıqlarının artırılmasına, yeni dostlar qazanmalarına töhfə verir. Şahmat, dama, futbol, voleybol, üzgüçülük və tennis yarışları, rəqs və rəsm üzrə təlimlər, sağlam qidalanma mövzusunda interaktiv oyunlar uşaqların istirahət dövründə bilik və bacarıqlarını üzə çıxarmalarına, onları inkişaf etdirmələrinə şərait yaradır.