İnsan həyatının ən böyük neməti sağlamlıqdır. Bu nemətin qorunması, insanların ömrünün uzadılması, xəstəliklərin qarşısının alınması və sağlam gələcəyin təmin olunması isə öz həyatını müqəddəs bir peşəyə həsr etmiş tibb işçilərinin üzərinə düşür. Həkimlər, tibb bacıları, feldşerlər, laborantlar və səhiyyənin müxtəlif sahələrində çalışan minlərlə insan hər gün insan sağlamlığı naminə yorulmadan çalışır, ağrılara məlhəm olur, ümidsizliyə ümid gətirir. Məhz buna görə də tibb peşəsi yalnız bir ixtisas deyil, yüksək mənəvi dəyərlərə söykənən insanlıq missiyası hesab olunur.

Azərbaycanda hər il iyunun 17-si Tibb İşçilərinin Peşə Bayramı Günü kimi qeyd edilir. Bu əlamətdar gün ölkəmizdə səhiyyə sahəsində çalışan insanların əməyinə verilən yüksək qiymətin, onların cəmiyyət qarşısındakı xidmətlərinə göstərilən ehtiramın ifadəsidir. Tibb işçilərinin peşə bayramı ümummilli lider Heydər Əliyevin 4 iyun 2001-ci il tarixli Sərəncamı ilə təsis edilmişdir.

Bu tarixin seçilməsi Azərbaycan səhiyyəsinin tarixində mühüm hadisə ilə bağlıdır. Belə ki, 1918-ci il iyunun 17-də Azərbaycan Xalq Cümhuriyyəti dövründə ölkənin ilk Səhiyyə Nazirliyi yaradılmışdır. Bununla da milli səhiyyə sisteminin formalaşdırılması istiqamətində mühüm addım atılmış, əhalinin sağlamlığının qorunmasının dövlət siyasətinin prioritet istiqamətlərindən biri olduğu təsdiqlənmişdir. Azərbaycan Xalq Cümhuriyyəti qısa müddət fəaliyyət göstərməsinə baxmayaraq, səhiyyə sahəsində mühüm islahatların əsasını qoymuş, yoluxucu xəstəliklərlə mübarizə, tibbi xidmətin təşkili və milli səhiyyə kadrlarının hazırlanması istiqamətində əhəmiyyətli tədbirlər həyata keçirmişdir.

Müstəqillik illərində Azərbaycan səhiyyəsi yeni inkişaf mərhələsinə qədəm qoymuşdur. Ümummilli lider Heydər Əliyevin rəhbərliyi ilə səhiyyə sisteminin yenidən qurulmasına başlanılmış, bu sahənin qanunvericilik bazası təkmilləşdirilmiş, tibb müəssisələrinin fəaliyyətinin müasir tələblərə uyğunlaşdırılması istiqamətində mühüm işlər görülmüşdür. Bu siyasət hazırda Azərbaycan Respublikasının Prezidenti İlham Əliyev tərəfindən uğurla davam etdirilir. Son illər ölkənin şəhər və rayonlarında onlarla müasir xəstəxana, diaqnostika və müalicə mərkəzi tikilərək istifadəyə verilmiş, səhiyyə müəssisələri ən müasir tibbi avadanlıqlarla təchiz edilmişdir. İcbari tibbi sığorta sisteminin tətbiqi isə əhalinin keyfiyyətli tibbi xidmətə əlçatanlığını daha da artırmışdır.

Azərbaycan səhiyyəsinin inkişafında Birinci vitse-prezident Mehriban Əliyevanın və Heydər Əliyev Fondunun həyata keçirdiyi layihələrin də xüsusi rolu vardır. Fondun təşəbbüsü ilə həyata keçirilən çoxsaylı humanitar aksiyalar, tibbi müayinələr, xəstə uşaqlara və ehtiyacı olan insanlara göstərilən dəstək cəmiyyət tərəfindən yüksək qiymətləndirilir.

Son illərin ən ciddi qlobal sınaqlarından biri olan COVID-19 pandemiyası tibb işçilərinin fədakarlığını və peşəkarlığını bir daha bütün dünyaya nümayiş etdirdi. Həyatlarını riskə atan həkimlər və səhiyyə əməkdaşları insanların sağlamlığının qorunması naminə gecə-gündüz çalışdılar. Azərbaycan tibb işçiləri də pandemiya ilə mübarizədə böyük qəhrəmanlıq göstərərək minlərlə insanın həyatının xilas edilməsinə nail oldular. Onlar aylarla ailələrindən uzaq düşərək, öz sağlamlıqlarını və həyatlarını risk altına qoyaraq insanların xilası naminə mübarizə apardılar. Təəssüf ki, bu mübarizə itkisiz ötüşmədi. Virusla mübarizənin ön cəbhəsində çalışan bir sıra həkimlər və səhiyyə işçiləri peşə borclarını yerinə yetirərkən həyatlarını itirdilər. Onların göstərdikləri fədakarlıq, peşəyə sədaqət və insan həyatına bağlılıq Azərbaycan səhiyyə tarixinin şərəfli səhifələrindən biri kimi yadda qaldı. 

Tibb peşəsinin böyüklüyü ondadır ki, onun əsas məqsədi insan həyatını qorumaqdır. Həkimin verdiyi hər qərar, göstərdiyi hər diqqət və qayğı insan taleyində mühüm rol oynayır. Bu peşənin sahibləri yalnız xəstəlikləri müalicə etmirlər, həm də insanlara yaşamaq ümidi, gələcəyə inam bəxş edirlər. Buna görə də tibb işçiləri hər zaman cəmiyyətin ən hörmətli və etibar edilən peşə sahibləri sırasında yer alırlar.

Ağ xalatın şərəfini daim uca tutan bu fədakar insanların əməyi cəmiyyətin ən qiymətli mənəvi sərvətlərindən biridir. İnsan ömrünə işıq, ailələrə sevinc, cəmiyyətə sağlam gələcək bəxş edən tibb işçilərinin xidmətləri hər zaman yüksək ehtiramla yad olunacaq, onların nəcib fəaliyyəti gələcək nəsillər üçün də örnək olaraq qalacaqdır.

Nurəngiz Adilqızı