Diz oynağı insan orqanizmində ən çox yüklənən oynaqlardan biridir. Gündəlik həyatımızda yerimək, pilləkən qalxmaq, oturub-durmaq kimi sadə görünən hərəkətlər belə diz oynağının sağlamlığından birbaşa asılıdır. Yaş artdıqca, artıq çəki, travmalar və ya uzunmüddətli fiziki yüklənmələr nəticəsində dizdə qığırdaq toxumasında zədələnmələr yarana bilər. Xalq arasında bu hal çox zaman “dizdə maye bitməsi” kimi ifadə olunur.

Mövzu ilə bağlı Proloterapiya və Ağrı Həkimi Gülnar Həmzəyevanın fikirlərini öyrəndik. Həkim bildirir ki, bu ifadə tibbi baxımdan tam doğru deyil: “Dizdə maye bitib dedikdə bu o demək deyil ki, dizdə maye tamamilə tükənib. Burada əsas məsələ qığırdaq zədələnməsi və oynaq mayesinin keyfiyyətinin azalmasıdır”.

Onun sözlərinə görə, bu vəziyyət əksər hallarda Osteoartrit – yəni diz osteoartriti ilə əlaqəlidir. Osteoartrit zamanı qığırdaq toxuması nazilir, oynaq səthlərində sürtünmə artır və nəticədə ağrı, şişkinlik, hərəkət məhdudluğu yaranır.

Həkim əsas simptomları belə sadalayır: “Xəstələr daha çox nərdivan qalxıb-enərkən ağrıdan şikayət edirlər. Dizdə istilik və şişkinlik olur. Yeriyərkən ağrı artır. Uzun müddət oturduqdan sonra isə diz sanki kilidlənir, ayağa qalxmaq çətinləşir”.

Mütəxəssis xüsusilə vurğulayır ki, belə hallarda ilk seçim kimi əməliyyata tələsmək doğru yanaşma deyil: “Çox gözəl nəticə aldığımız müalicə terapiyalarımız var. Əməliyyat ikinci seçim olaraq dəyərləndirilməlidir”.

Onun sözlərinə görə, uyğun xəstələrdə dizin daxili və periartikulyar sahələrinə tətbiq olunan bioloji və regenerativ müalicə üsulları effektiv nəticə verə bilər: “Prolozon, PRP, egzosom, kök hüceyrə və kollagen əsaslı müalicə üsullarını xəstəliyə və xəstəyə özəl şəkildə təyin edirik. Edilən prosedurların sayı xəstəliyin ağırlıq dərəcəsindən asılı olaraq dəyişir”.

Həkim bildirir ki, bu müalicələrin əsas məqsədi ağrını azaltmaq, oynağın funksiyasını bərpa etmək və xəstənin gündəlik həyat keyfiyyətini artırmaqdır. Vaxtında və düzgün planlaşdırılmış terapiya bir çox hallarda əməliyyata ehtiyacı gecikdirə və ya tamamilə aradan qaldıra bilər.

Diz ağrıları ilə üzləşən hər kəs bilməlidir ki, bu problem mütləq cərrahi müdaxilə demək deyil. Müasir tibbdə tətbiq olunan innovativ və fərdi yanaşmalar sayəsində əməliyyatsız uğurlu nəticələr əldə etmək mümkündür. Həkim Gülnar Həmzəyevanın da vurğuladığı kimi, “hər xəstə ayrıca qiymətləndirilməli və müalicə planı fərdi şəkildə müəyyənləşdirilməlidir”.

Sağlam və aktiv həyat üçün əsas şərt isə vaxtında mütəxəssisə müraciət etməkdir.

Nurəngiz Adilqızı