2026-cı ilin ölkəmizdə “Şəhərsalma və Memarlıq ili” elan olunması Azərbaycanın müasir inkişaf mərhələsində şəhər mühitinə verilən önəmin bariz ifadəsidir. Bu əlamətdar ildə Bakının Ümumdünya Şəhərsalma Forumu – WUF13-ə ev sahibliyi etməyə hazırlaşması isə paytaxtın qlobal urbanizasiya xəritəsində mövqeyini daha da möhkəmləndirir.

Belə bir dövrdə şəhərsalma sahəsində həyata keçirilən hər bir layihə, yaradılan hər bir yeni məkan yalnız yerli deyil, beynəlxalq miqyasda da diqqətlə izlənilir. Nərimanov rayonunda - metronun “Gənclik” stansiyasının yaxınlığında salınan, “Antena” sahəsi kimi tanınan, paytaxt sakinlərinin yaddaşında “Gənclik” parkı kimi yer alan yaşıllıq məkanı da məhz belə uğurlu layihələrdən biridir.

2025-ci ildə əsaslı yenidənqurmadan sonra istifadəyə verilən park qısa müddətdə şəhərin ən sevilən istirahət ünvanlarından birinə çevrilmişdir. Açılış mərasimində Azərbaycan Respublikasının Prezidenti İlham Əliyev və birinci xanım Mehriban Əliyevanın iştirakı bu layihənin dövlət səviyyəsində xüsusi əhəmiyyət daşıdığını bir daha təsdiqləmişdir.

Ümumi sahəsi 19 hektara yaxın olan parkın böyük hissəsi yaşıllıq zolaqları ilə əhatə olunmuş, burada minlərlə ağac və dekorativ bitki əkilmişdir. Müasir suvarma sistemi, işıqlandırma infrastrukturu, fəvvarələr, piyada və velosiped yolları, idman və uşaq əyləncə zonaları parkın funksionallığını daha da artırır. Bu məkan artıq təkcə istirahət üçün deyil, həm də sağlam həyat tərzinin təşviqi üçün mühüm bir platformaya çevrilmişdir.

Parkın mühüm üstünlüklərindən biri də onun Dədə Qorqud parkı ilə yeraltı keçid vasitəsilə birləşdirilməsidir. Bu, şəhərsalma baxımından olduqca uğurlu həll olmaqla yanaşı, paytaxtda vahid yaşıllıq zolağının formalaşdırılmasına xidmət edir və sakinlərin rahat hərəkətini təmin edir.

Yazın gəlişi ilə yenidən yolumuzu bu yaşıl məkandan saldıq. Park sanki yenidən doğulmuşdu – ağaclar tumurcuqlamış, çiçəklər rəngə boyanmış, fəvvarələrin səsi isə yazın ritmini pıçıldayırdı. Görünüşü və funksional imkanları ilə geniş məşhurluq qazanmış “Gənclik” parkı adından da göründüyü kimi, ilk növbədə, gənclərin istirahəti, idmanı və sosiallaşması üçün nəzərdə tutulsa da, buraya ailələr, yaşlı insanlar və uşaqlar da tez-tez gəlirlər. “Gənclik” parkı bu gün Bakının əsas istirahət məkanlarından biri olmaqla yanaşı, həm də şəhərsalma baxımından mühüm bir layihənin tərkib hissəsi kimi qiymətləndirilir.

Müasir istirahət kompleksinin ərazisinin 14 hektarında yaşıllıq sahələri salınıb, 20 mindən çox ağac və kol əkilib. Parkın ərazisindəki mövcud tarixi inzibati bina saxlanılıb və binada bərpa işləri aparılıb. Yeni salınan parkda sakinlərin və qonaqların asudə vaxtlarının səmərəli təşkili üçün qısa müddətdə gözəl şərait yaradılıb. Belə ki, burada kiçik yaşlı uşaqlar üçün təhlükəsiz oyun meydançaları, açıq havada trenajorlar, velosiped yolları, basketbol və futbol meydançaları, fontanlar və kiçik süni göl, kafe və restoranlar, həmçinin “street food” tərzində fəaliyyət göstərən kiçik köşklər, konsertlər və tədbirlər üçün istifadə olunan açıq səhnə quraşdırılıb. Bütün bunlar istirahət məkanına əlavə gözəllik verir.

Oturacaqlardan birində əyləşmiş iki tələbə ilə söhbətə başladıq. Onlardan biri – Azərbaycan Dövlət İqtisad Universitetinin tələbəsi Toğrul Əliyev dedi:

– Son illər Bakıda keçirilən forumlar ölkəmizi daha yaxşı tanıdır. Biz də burada, belə yerlərdə xarici qonaqlarla tez-tez qarşılaşırıq. Bu park da artıq beynəlxalq mühitin bir hissəsinə çevrilib.

Bir qədər irəlidə velosiped sürən gənclər diqqətimizi çəkdi. Onlardan biri, Anar, parkın yenilənmiş siması haqqında fikirlərini belə ifadə etdi:

– Əvvəllər də bura gəlirdik, amma indi daha səliqəli, daha müasirdir. Düşünürəm ki, şəhərə gələn qonaqlar üçün də bu cür məkanlar çox önəmlidir.

Parkın mərkəzinə yaxın hissədə isə diqqətimizi fərqli bir sima çəkdi. Əlində fotoaparat olan orta yaşlı bir kişi ətrafı diqqətlə izləyirdi. Onunla söhbət zamanı məlum oldu ki, o, İtaliyadan gəlmiş turist Markodur. O, Bakıya turist kimi səyahətə gəldiyini bildirdi:

– Bakı məni çox təəccübləndirdi. Burada müasirlik və ənənə harmoniyadadır. Bu park isə şəhərin ruhunu hiss etmək üçün ideal yerdir. İnsanlar çox mehribandır. Markonun sözləri bir daha təsdiqlədi ki, bu cür ictimai məkanlar təkcə istirahət üçün deyil, həm də mədəniyyətlərarası ünsiyyət üçün mühüm platformadır. Parkda eşidilən müxtəlif dillər, fərqli mədəniyyətlərin nümayəndələrinin bir arada olması Azərbaycanın açıq və qonaqpərvər ölkə olduğunu nümayiş etdirir.

Bir qədər irəlidə uşaq meydançasından gələn gülüş səsləri bu fikirləri yarımçıq kəsir. Gənc ana Nigar xanım deyir:

– Şəhərdə uşağı harasa aparmaq çətindir. Amma bura həm təhlükəsizdir, həm də genişdir. Saatlarla qalmaq olur.

Bakı şəhərinin gündəlik tələskənliyindən bir qədər uzaqlaşıb nəfəs almaq istəyən ailələrin ən sevdiyi ünvanlardan biri də məhz bu parkdır. Xüsusilə yaz aylarında bura tamam başqa bir rəng alır – məktəblilər valideynləri ilə birlikdə bura axışır, yaşıllıq isə sanki onların sevincini daha da artırır.

Parkın günəşli və sakit guşələrindən birində piknik edən məktəblilərin şən səsi diqqətimizi cəlb edir. Onlardan biri Ömür Əliyeva gülümsəyərək deyir:

– Biz Xəzər rayonunun 123 saylı orta məktəbinin 8 “B” sinif şagirdləriyik. Bu gün dərs deyil, həftəsonudur. Günəşli hava fürsətini qaçırmayıb bura piknikə gəlmişik. Park çox gözəldir, burada vaxt keçirmək insana həqiqətən xoş əhval bəxş edir”.

Onların yanında olan valideyn Firuzə xanım isə bu fikirləri tamamlayır:

– Belə gözəl, səliqəli və təhlükəsiz parkların olması ailələr üçün böyük üstünlükdür. Uşaqlar açıq havada dincəlir, bir-biri ilə ünsiyyət qurur, təbiətə yaxın olurlar. Bu cür yaşıllıq məkanları insanın ruhunu dincəldir, şəhər həyatına xüsusi bir rahatlıq gətirir.

Ən maraqlısı isə budur ki, park günün hər saatında fərqli “yaşayır”. Səhərlər idman edənlərin, günorta ailələrin, axşam isə gənclərin məkanına çevrilir. Sanki hər saat park yeni bir hekayə yazır.

“Gənclik” parkı həm də şəhərin nəfəsidir. Beton binaların arasında sıxılmış həyat üçün açıq bir pəncərədir. Burada insanlar təkcə gəzmirlər, düşünürlər, xatırlayırlar, bəzən də sadəcə susurlar.

Gün batımına yaxın parkın üzərinə yayılan sakitlikdə belə həyatın ahəngi hiss olunur. Yarpaqların xışıltısı, fəvvarələrin şırıltısı, uzaqdan gələn uşaq gülüşləri – bütün bunlar bir şəhərin nəfəsidir. Bu nəfəs yaşıl nəfəsdir. Bu nəfəs Bakının gələcəyidir. “Gənclik” parkı isə həmin gələcəyin bu gündən görünən ən gözəl ünvanlarından biridir.

Nurəngiz ADİLQIZI.