Azərbaycanda dövlət aqrar sığorta mexanizmi çərçivəsində pambıq əkinlərinin sığortalanması mövsümünə start verilib. Pambıq əkini ilə məşğul olan fermerlər və təsərrüfatlar Aqrar Sığorta Fonduna (ASF) müraciət edərək dövlət dəstəyi ilə təqdim edilən güzəştli aqrar sığorta mexanizmi vasitəsilə əkinlərini sığorta etdirə bilərlər.

Son aylar Azərbaycanda baş verən təbiət hadisələri, güclü yağışlar və sel-subasma halları digər sahələrdə olduğu kimi, pambıq əkinləri üçün də böyük risk yaradır. Pambıq sahələrinə ən çox dolu, sel-subasma, leysan yağışlar və üçüncü şəxslərin hərəkətləri kimi amillər zərər vurur. Bu halların yaratdığı zərərlərin qarşısını almağın ən effektiv yolu pambıq sahələrini vaxtında sığortalamaqdır.

Pambıq sahələrinin sığortalanması may ayının sonunadək davam edəcək.

Fermerlər 50 faizlik dövlət dəstəyi sayəsində pambıq sahələrini cüzi ödənişlə sığorta etdirə bilərlər. Belə ki, ölkənin əksər ərazilərində 1000 manatlıq pambıq məhsulunun sığortası cəmi 7–10 manat təşkil edir.

Qeyd edək ki, indiyədək zərərlə üzləşmiş minlərlə fermerə aqrar sığorta vasitəsilə 2,2 milyon manatdan artıq ödəniş edilib. Belə ki, 2023-cü ildə 686 hektar sahəyə dəymiş zərərə görə fermerlərə 386 min manat, 2024-cü ildə 4 min hektar əraziyə dəymiş zərərə görə 880 min manat, 2025-ci ildə isə 2064 hektar pambıq sahəsində baş vermiş hadisələr üzrə 958 min manat sığorta ödənişi həyata keçirilib.

Aqrar sığorta məhsulları, əkinlərin və heyvanların sığortalanması şərtləri, eləcə də sığorta haqları barədə ətraflı məlumatı ASF-nin rəsmi internet səhifəsindən (asf.gov.az), həmçinin 1651 Çağrı Mərkəzinə müraciət etməklə əldə etmək mümkündür.