Cari ilin 13-17 may tarixlərində Avstriyanın Vyana şəhərində BMT-nin Cinayətkarlığın Qarşısının Alınması və Cinayət Ədliyyəsi Komissiyasının 33-cü sessiyası keçirilib.

Sessiyada Azərbaycan Respublikasının Baş Prokurorluğunu Daxili işlər orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin prokuroru Orxan Yusubov təmsil edib.

Tədbirdə Cinayətkarlığın Qarşısının Alınması və Cinayət Ədliyyəsi Komissiyasının fəaliyyət sisteminin təkmilləşdirilməsi istiqamətləri; qarşılıqlı hüquqi yardım və ekstradisiya məsələləri üzrə beynəlxalq əməkdaşlıq praktikasının inkişaf etdirilməsi; Cinayətkarlığın Qarşısının Alınması və Cinayət Ədliyyəsi üzrə 14-cü BMT Konqresinin nəticələrinin müzakirəsi və Cinayətkarlığın Qarşısının Alınması və Cinayət Ədliyyəsi üzrə 15-ci BMT Konqresinə hazırlıq məsələləri; cinayətlərin dinamikası və dünyadakı yeni cinayət trendlərinə qarşı mübarizə vasitələri; dövlətlərarası tərəfdaşlıq zamanı meydana gələn çətinliklərin aradan qaldırılması mövzuları ilə bağlı çıxışlar edilmiş və fikir mübadiləsi aparılıb.

Sessiya zamanı Orxan Yusubov tərəfindən Cinayətkarlığın Qarşısının Alınması və Cinayət Ədliyyəsi Komissiyasının 33-cü sessiyasının gündəliyində yer alan məsələlərdən ümumi debat çıxışları edilib, Azərbaycan Respublikasının cinayətkarlığa qarşı mübarizədə göstərdiyi səylər, BMT-nin cinayətkarlığa qarşı mübarizə üzrə hüquqi sənədlərinin ölkədə tətbiq olunma səviyyəsi, son illər Azərbaycan Respublikasının qarşılaşdığı çətinliklər istiqamətində məlumatlar verilib, yeni cinayət trendləri başlığı altında cinayətkarlar tərəfindən müasir vasitələr kimi yüksək texnologiyalar, süni intellekt, humanitar təşkilatlara yardım adı altında terrorçuluğun maliyyələşdirilməsi hallarının qarşısının alınması üzrə ölkə praktikası sessiya iştirakçılarına çatdırılıb.