“19 May - Atatürkü Anma, Gənclik və İdman Bayramı” münasibətilə Türkiyədə keçirilən tədbirlərlə əlaqədar olaraq İstanbul Boğazında gəmilərin hərəkəti müvəqqəti dayandırılıb.

Lider-media.az xəbər verir ki, bayram münasibətilə ölkədə təşkil olunan “Gənclik və İdman” festivalları çərçivəsində İstanbul Boğazında yelkənli qayıq yarışları keçirilir. Türkiyənin Sahil Mühafizə Xidməti yarışların yerli vaxtla saat 18:00-dək davam edəcəyi və turnir bitənədək gəmi keçidlərinə icazə verilməyəcəyi barədə məlumat yayıb.

Xatırladaq ki, Türkiyənin Gənclik və İdman Nazirliyi tərəfindən 2024-cü il ölkədə “Hərəkətlilik ili” elan edilib. Mötəbər gün münasibətilə ölkənin 81 vilayətində “Sağlam gələcək üçün hərəkət et” şüarı ilə “Türkiyənin gücü: gəncliyi” başlıqlı idman yarışları və elmi-mədəni tədbirlər keçirilir.