Bilik Günü ərəfəsində Naxçıvanda aztəminatlı ailələrdən, o cümlədən valideynlərini itirən və valideyn himayəsindən məhrum olan, təkvalideynli, sağlamlıq imkanları məhdud, qazi və çoxuşaqlı ailələrin övladlarına məktəbli geyimləri və dərs ləvazimatları təqdim olunub.

Tədbir Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyinin və Naxçıvan Nazirlər Kabinetinin dəstəyi, Naxçıvan Əmək və Əhalinin Sosial Müdafiəsi Nazirliyi, Naxçıvan Ailə, Qadın və Uşaq Problemləri üzrə Dövlət Komitəsi və Naxçıvan Həmkarlar İttifaqları Şurasının birgə təşkilatçılığı ilə keçirilib.

Naxçıvan Həmkarlar İttifaqları Şurasının inzibati binasında baş tutan tədbir Ulu Öndər Heydər Əliyevin və Azərbaycanın ərazi bütövlüyü uğrunda şəhid olan qəhrəmanların əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb. Tədbirdə çıxış edən Naxçıvan Həmkarlar İttifaqları Şurasının sədri Qəzənfər Abdullayev qeyd edib ki, xüsusi qayğıya ehtiyacı olan uşaqların sosial rifahının yaxşılaşdırılması daim diqqət mərkəzində saxlanılır, onlara həm maddi, həm də mənəvi dəstək göstərilir. Eyni zamanda uşaqların asudə vaxtlarının səmərəli təşkili məqsədilə müxtəlif mövsümi istirahət düşərgələri təşkil olunur.

Naxçıvan Ailə, Qadın və Uşaq Problemləri üzrə Dövlət Komitəsinin sədri Ramilə Seyidova bildirib ki, ölkəmizdə uğurla həyata keçirilən uşaq siyasəti nəticəsində cəmiyyətin bütün təbəqələrindən olan uşaqlara hərtərəfli diqqət və qayğı göstərilir. Muxtar respublikada da bu istiqamətdə ardıcıl və məqsədyönlü tədbirlər həyata keçirilir.

Naxçıvan Nazirlər Kabinetinin Humanitar məsələlər şöbəsinin müdiri Tarverdi Məmmədov isə vurğulayıb ki, uşaqların rifahı dövlət siyasətinin prioritet istiqamətlərindəndir. Onların hüquqlarının qorunması, təhsili, sağlamlığı və sosial müdafiəsi ilə bağlı əhəmiyyətli tədbirlər reallaşdırılır. Bu gün keçirilən tədbir də həmin fəaliyyətlərin mühüm tərkib hissəsidir.

Sonra uşaqlara məktəbli geyimləri və dərs ləvazimatları təqdim olunub. Bu təşəbbüs uşaqlar və valideynlər tərəfindən sevinclə  qarşılanıb. Onlar göstərilən diqqət və dəstəyə görə təşəkkürlərini bildiriblər.

Tədbir iştirakçıları Naxçıvan Həmkarlar İttifaqları Şurasının xüsusi qayğıya ehtiyacı olan uşaqlarla bağlı həyata keçirdiyi layihələri əks etdirən qısa videoçarxı da izləyiblər.

Qeyd edək ki, muxtar respublikanın digər rayonlarında da analoji tədbirlər keçirilib və ümumilikdə 132 nəfər xüsusi kateqoriyadan olan uşağa məktəbli geyimləri və dərs ləvazimatları, 348 uşağa isə maddi dəstək göstərilib.