İqtisadiyyat naziri Mikayıl Cabbarovun Şimali Makedoniyaya işgüzar səfəri çərçivəsində keçirilən görüşlərdə bu ölkə ilə münasibətlərin prioritet istiqamətləri və iqtisadi əməkdaşlığın inkişafına dair müzakirələr aparılıb. 

İqtisadiyyat naziri Mikayıl Cabbarovun rəhbərlik etdiyi nümayəndə heyəti  Şimali Makedoniyaya işgüzar səfər edib.

Səfər çərçivəsində Şimali Makedoniya Respublikasının Prezidenti xanım Qordana Silyanovska-Davkova Azərbaycan nümayəndə heyətini qəbul edib.

Şimali Makedoniya Respublikasının Prezidenti xanım Qordana Silyanovska-Davkova ölkələrimiz arasında dostluq əlaqələrinin genişləndiyini vurğulayıb, tərəfdaşlığın möhkəmləndirilməsi barədə fikirlərini bölüşüb.

İqtisadiyyat naziri Mikayıl Cabbarov Şimali Makedoniya ilə əməkdaşlığın sürətlə inkişaf etdiyini, iqtisadi-ticarət münasibətlərinin genişləndiyini bildirib. Qeyd edilib ki, tərəfdaşlığın möhkəmləndirilməsi üçün böyük potensial var. Bu baxımdan, birgə layihə və təşəbbüslərin həyata keçirilməsi mühüm əhəmiyyət kəsb edir. Görüşdə ölkəmizin iqtisadi potensialı haqqında məlumat verilib, əlaqələrin prioritet istiqamətləri və iqtisadi işbirliyinin inkişaf perspektivləri diqqətə çatdırılıb.

İqtisadiyyat naziri Mikayıl Cabbarovun Şimali Makedoniyanın Assambleyasının sədri Afrim Qaşi ilə görüşündə qarşılıqlı faydalı əməkdaşlığın, həmçinin ticarət, investisiya və digər sahələrdə işbirliyinin gücləndirilməsinin önəmi qeyd olunub. Ölkələrimiz arasında iqtisadi sahədə birgə fəaliyyət üçün böyük potensial olduğu bildirilib. Enerji, ticarət, investisiya tərəfdaşlığının perspektivləri və müqavilə-hüquq bazasının genişləndirilməsi məsələləri nəzərdən keçirilib. 

Şimali Makedoniyanın Baş nazirinin birinci müavini, ətraf mühit və fiziki planlaşdırma naziri İzet Mexhiti ilə görüşdə Azərbaycanın əlverişli investisiya mühiti və iqtisadi potensialı haqqında məlumat verilib, ölkəmizin əlverişli coğrafi mövqedə, mühüm nəqliyyat qovşaqlarının kəsişməsində yerləşdiyi və tranzit “hab”a çevrildiyi qeyd edilib. Tərəflər əlaqələrin perspektivləri, birgə təşəbbüslər və potensial layihələr, ənənəvi və bərpa olunan enerji üzrə tərəfdaşlığın möhkəmləndirilməsi barədə müzakirə aparıblar.

Şimali Makedoniyanın iqtisadiyyat və əmək naziri Besar Durmişi ilə görüşdə ticarət, investisiya, enerji, turizm və nəqliyyat sahələri üzrə birgə fəaliyyətin intensivləşdirilməsinin əhəmiyyəti vurğulanıb. İqtisadi sahədə gündəmdə olan tərəfdaşlıq məsələləri, o cümlədən müxtəlif sektorlarda prioritet layihələrin reallaşdırılmasına maraq ifadə olunub, ölkələrimizin biznes dairələri arasında işgüzar əlaqələrin təşviqi imkanları nəzərdən keçirilib. 

Şimali Makedoniyanın Avropa işləri naziri Orhan Murtezani ilə görüşdə Azərbaycanın uzunmüddətli strateji təşəbbüsləri, regional və qlobal layihələr, habelə reallaşdırılan investisiya təşəbbüsləri barədə məlumat verilib. Görüşdə ölkələrimizin enerji, sərmayə, ticarət, turizm və aqrar sahə üzrə tərəfdaşlığının təşviqi perspektivləri qeyd edilib, əməkdaşlıq sahələrinin şaxələndirilməsinin qarşılıqlı faydaları dəyərləndirilib.