Bu gün Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin Nizamnaməsinin təsdiq edilərək fəaliyyətə başlamasından 5 il ötür.

Prezident İlham Əliyevin 30 iyun 2020-ci il tarixli Fərmanı ilə Nizamnaməsi təsdiq edilərək fəaliyyətə başlayan Sosial Xidmətlər Agentliyi sosial xidmətə ehtiyacı olan şəxslərə qanunla müəyyən edilmiş forma və növlər üzrə sosial xidmət göstərilməsi, onların sosial müdafiəsi və rifahının yaxşılaşdırılması, habelə övladlığagötürmə və himayədar ailə bağlı dövlət siyasətinin və tənzimləmənin həyata keçirilməsi sahəsində fəaliyyəti həyata keçirir.

Agentlik bütün ölkəni əhatə edən 13 filialı və 21 müəssisəsi ilə bütün yaş kateqoriyalarından olan əhali qruplarına səyyar, stasionar və yarımstasionar xidmətlər göstərir.

Son beş ildə qurum tərəfindən həssas əhali qruplarından olan şəxslərə 550 mindən çox  xidmət (sosial-məişət xidməti, mənzil və avtomobillə, sanatoriya-kurort göndərişləri ilə təminat, övladlığagötürmə, himayədar ailə, repatriasiya və s.) göstərilib. Həmin dövrdə 19 minədək vətəndaşın evlərində, 17 mindən çox şəxsin Agentliyin müəssisələrində sosial xidmətlərlə təminatı həyata keçirilib.

Agentliyin sifarişləri ilə icra olunan layihələr çərçivəsində yaradılan günərzi qayğı və sosial reabilitasiya mərkəzlərində, məişət zorakılığından zərər çəkmiş şəxslər üçün yardım mərkəzlərində isə 40 minə yaxın şəxsə xidmətlər göstərilib. O cümlədən bölgələrdə yaradılan 121 günərzi qayğı mərkəzi və 100-dən çox sosial reabilitasiya mərkəzində həssas qruplara aid 15 minədək uşağın qavrayış, emosional, fiziki inkişafına, ilkin yazı və oxuma bacarıqlarına yiyələnməsinə dəstək işləri aparılıb.

Sosial Xidmət Mərkəzlərinin şəbəkəsinin genişləndirilməsi işləri davam edir və bu il daha 5 belə mərkəzin açılması planlaşdırılır ki, bununla da həmin mərkəzlərin sayı 10-a çatacaq.

2023-cü ildən Avropa Sosial Şəbəkəsinin üzvü olan Sosial Xidmətlər Agentliyi Asiya-Sakit Okean regionu üzrə nüfuzlu “Asiya Mükafatı” müsabiqəsində “Asiyanın Seçilən Sosial Xidmət Agentliyi Mükafatı” və “Asiya Uşaq İnkişafı Mükəmməlliyi Mükafatı”na, üç istiqamət üzrə beynəlxalq ISO sertifikatlarına, qurumun bir sıra mobil tətbiqləri milli mükafatlara layiq görülüb.

Dövlətimizin başçısının Sərəncamı ilə təsdiq edilən “Azərbaycan Respublikasında sosial xidmətin inkişafına dair 2023-2026-cı illər üçün Dövlət Proqramı”na uyğun olaraq sosial xidmətlər sisteminin və bu sahədə ixtisaslı kadr potensialının inkişaf etdirilməsi, sosial xidmətlərin əhatə dairəsinin genişləndirilməsi, sosial xidmətlərdə ünvanlılığının və keyfiyyətli xidmətlərə əlçatanlığın təmin edilməsi istiqamətində fəaliyyətini davam etdirir.