Azərbaycan Həmkarlar İttifaqları Konfederasiyasının Əmək və Sosial Münasibətlər Akademiyası (AƏSMA) ilə Holberton Azərbaycan Məktəbi arasında əməkdaşlıq memorandumu imzalanıb.

Tədbirdə Akademiyanın rektor vəzifəsini icra edən Yusif Ağayev çıxış edərək əmək bazarının dəyişən tələblərinə cavab verə biləcək kadrların hazırlanması baxımından informasiya texnologiyaları sahəsində bilik və bacarıqların artırılmasının önəmini vurğulayıb. Yusif Ağayev bu əməkdaşlığın tələbələrin bilik və bacarıqlarının inkişafında əhəmiyyətli olacağını, praktiki və innovativ öyrənmə mühitinin yaradılmasına şərait yaradacağını bildirib.

Holberton Azərbaycan Məktəbinin direktoru Şəmsi Bayramzadə çıxışında məktəbin peer-to-peer (tələbədən-tələbəyə) əsaslı öyrənmə modeli haqqında məlumat verərək AƏSMA tələbələrinin bu yanaşmaya yüksək maraq göstərdiyini və effektiv nəticələr əldə ediləcəyini vurğulayıb.

Qeyd edək ki, memorandum proqramlaşdırma və süni intellekt kimi sahələrdə mütəxəssislərin hazırlanması, innovativ layihələrin birgə həyata keçirilməsi, qarşılıqlı təcrübə və resurs mübadiləsi, eləcə də AƏSMA tələbələri üçün ödənişsiz tədris proqramlarının təşkili kimi istiqamətləri əhatə edir. Sənəd həmçinin innovativ təşəbbüslərin dəstəklənməsi və təhsil prosesində tətbiqini nəzərdə tutur.