İyun ayının 12-də Dövlət Sərhəd Xidmətinin Xüsusi Məktəbində 2024-2025-ci tədris ilinin başa çatması ilə əlaqədar “Son zəng” tədbiri keçirilmişdir.

Bu barədə Lider-media.az-a DSX-nin Mətbuat Mərkəzindən məlumat verilib.

Bildirilib ki, Dövlət Himninin səsləndirilməsi ilə başlayan tədbirdə Ulu Öndər Heydər Əliyevin və ərazi bütövlüyümüz uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad olunmuşdur.

Tədbirdə Xüsusi Məktəbin pedaqoji heyəti, kursantlar və valideynlər iştirak etmişlər.

Çıxış edənlər Dövlət Sərhəd Xidmətinin Xüsusi Məktəbinin Azərbaycan Respublikasının sərhəd təhlükəsizliyinin təmin olunmasında mühüm rol oynayan, yüksək bilik və peşəkarlığa malik, vətənə, xalqa və Müzəffər Ali Baş Komandana sadiq sərhədçi kadrların yetişdirilməsində xüsusi əhəmiyyət daşıdığını vurğulamışlar. 

Bildirilmişdir ki, burada təhsil alan kursantlar təkcə nəzəri biliklərlə deyil, həm də müasir texnologiyalara əsaslanan təlimlərlə silahlanaraq gələcəyin sərhədçi zabitləri kimi formalaşırlar. Onların ali hərbi təhsilə hazırlanması, vətənpərvərlik və dövlətçilik ruhunda tərbiyə olunması Xüsusi Məktəbin əsas fəaliyyət istiqamətlərindəndir.

Heydər Əliyev Fondunun dəstəyi ilə 14 il əvvəl fəaliyyətə başlamış, qısa müddət ərzində nüfuzlu və qabaqcıl təhsil müəssisələrindən birinə çevrilmiş Xüsusi Məktəbin açılış mərasimində, eləcə də 2018-ci ildə yeni inşa olunmuş ikinci tədris korpusunun istifadəyə verilməsi zamanı Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın şəxsən iştirakının ölkə rəhbərliyinin sərhəd mühafizəsinə, gənc nəslin hərbi-vətənpərvərlik ruhunda yetişdirilməsinə göstərdiyi ali diqqət və qayğının bariz nümunəsi olduğu qeyd olunmuşdur.

Göstərilən etimadın nəticəsidir ki, Dövlət İmtahan Mərkəzi tərəfindən 2024-2025-ci ilin yekunlarına dair keçirilmiş imtahanlarda Xüsusi Məktəbin 11-ci siniflər arasında 3 kursantı, 9-cu siniflər arasında 15 kursantı fərqlənmə attestatına layiq görülmüş, 11-ci siniflər arasında 21 kursantı, 9-cu siniflər arasında 45 kursantı 200-dən yuxarı bal toplamışdır.

Dövlət Sərhəd Xidmətinin rəisi general-polkovnik Elçin Quliyevin təbrik telefonoqramı şəxsi heyətə çatdırıldıqdan sonra Xüsusi Məktəbi bitirən kursantlara döş nişanları təqdim olunmuş, məzunların xatirəsini əks etdirən adlı siyahı “Məzun simvolu” olan nar ağacına sancılmışdır.

Tədbirin sonunda 5-ci və 11-ci sinif kursantlarının iştirakı ilə məzunların buraxılışına həsr olunan çinar ağacı əkilmişdir.