Dünya Bankı Qrupunun və Beynəlxalq Valyuta Fondunun 2025-ci il Yaz İclasında Azərbaycanda qadın əməyi ilə bağlı son illər aparılan islahatlar nümunə kimi göstərilib. İclas çərçivəsində Dünya Bankının Qadın, Biznes və Hüquq layihəsinin aparıcı mütəxəssisi Julia Braunmiller qadınlar üçün iş yerləri yaradılmasına dair təqdimatla çıxış edib. Təqdimatda qadın əməyi ilə bağlı uğurlu islahat təcrübəsi olan üç ölkədən bəhs edilib. Onların sırasında Azərbaycan da qeyd olunaraq, ölkəmizdə qadınların məşğulluq imkanlarının artırılması üçün son illər aparılan islahatların nümunəvi olduğu diqqətə çatdırılıb.

Bu islahatlar ölkədə qadınların əmək bazarında iştirakı ilə bağlı böyük irəliləyiş kimi qeyd olunub. Qadınların bir çox peşə sahələrində (dəmiryolu mühəndisi, avtobus sürücüsü və s.) işləməsi ilə bağlı əvvəllər mövcud olmuş məhdudiyyətlərin artıq müvafiq qanun dəyişiklikləri ilə aradan qaldırıldığı bildirilib. Nəticədə qadınların əmək bazarında iştirak imkanlarının artmasının əyani nümunəsi olaraq dəmir yolları sistemində qatar sürücüsü işləyən ilk qadın haqqında məlumat verilib.

Qeyd edək ki, son illər Əmək və Əhalinin Sosial Müdafiəsi Nazirliyi, habelə Biznes mühiti və beynəlxalq reytinqlər üzrə Komissiyanın Nazirliyin rəhbərlik etdiyi “Əmək bazarı” işçi qrupunun təklifləri əsasında əmək qanunvericiliyində qadın əməyi ilə bağlı qabaqcıl dünya təcrübəsinə uyğun təkmilləşdirmələr aparılıb.

Bu islahatların müsbət nəticəsi kimi, Dünya Bankının Qadın, Biznes və Hüquq üzrə 2024-cü il nəşrindəki hesabat-reytinqdə Azərbaycan öz indeksini 78,8-dən 85-ə çatdırıb və 35 pillə irəliləyərək, 190 ölkə arasında 104-cü pillədən 69-cu pilləyə yüksəlib.